Циркумцизија е хируршка процедура со која се одстранува кожичката од машкиот полов орган
Циркумцизија или обрежување е процедура со која хируршки се одстранува кожичката, ткивото кое го покрива Глансот (главата на машкиот полов орган). Тоа е древна практика која кај повеќето луѓе се врши како суштински дел од нивната религија. Јудаизмот и исламот гледаат дека обрежувањето е обврска кон Бог или начин да се потврди посветеноста на нивната вера.
Постојат заедници во Африка и Азија, кои го практикуваат обрежувањето на одредена возраст и сметаат дека со овој акт едно момче поминува во машкоста.
Според СЗО во светски рамки пропорција на машки индивидуи кои се циркумцизирани се движи од 1/6 до 1/3. Според проценките на СЗО 664,500,000 машки индивидуи се циркумцизирани на возраст од 15 години (30% од глобалната преваленца) од кои 70% се од религиозни причини.
Првите неколку години од животот се периодот во кој е нормално за кожичката на глансот на бебето да се повлече. Кај повеќето момчиња целосна сепарација настанува на возраст од пет години и доколку тоа не се случи е потребна медицинска помош, бидејќи постои ризик од настанување на инфекција (баланитис). Она што треба да се знае е дека никогаш не треба да се прави насилно враќање на кожата на глансот бидејќи може да биде болно и да дојде до оштетување.
Медицински причини за правење на циркумцизија
Употребата на циркумцизијата од медицински или здравствени причини е прашање кое продолжува да се дебатира. Американската академија за педијатрија (ААП) покажа дека здравствените придобивки од обрежувањето кај новороденче ги надминуваат ризиците, но придобивките не се доволно големи за да се препорача обрежување како составна процедура при актот на раѓање. Постапката може да се препорача кај постарите момчиња и мажи за лекување на фимоза (неспособност да се повлече кожичката) или за лекување на инфекција на пенисот.
Контраиндикации
- хипоспадии еписпадии;
- неодредени гениталии;
- заробен пенис(буриед);
- прематурност;
- аномалии на пенис.
Здравствени придобивки
- намален ризик од инфекции на уринарниот тракт (повеќето од уринарните инфекции се благи и може успешно да се излечат со антибиотици. Сепак, треба да се има во предвид дека честите уринарни инфекции може да доведат до оштетување на бубрези);
- намален ризик од некои сексуално преносливи болести кај мажите.
- заштита од рак на пенисот и намален ризик од рак на грлото на матката кај женските полови партнери.
- превенција на баланитис (воспаление на глансот) и баланопоститис (воспаление на глансот и кожичката).
- превенција на фимоза (неспособност да се повлече кожичката) и парафимоза (неспособност да се врати кожичката на првобитната локација). При парафимоза може да се примени локален анестетикски гел и со мал засек да се се намали притисокот.
Постапка
Со оглед на тоа што циркумцизијата е хируршка процедура треба да се изведе во асептични услови и анестезија. Строго препорачливо е да се изведе со пенилен или каудален блок но понекогаш и со општа анестезија. Како и повеќето операции на пенис циркумцизијата дава голема постоперативна болка. Пенилниот и каудалниот блок даваат добра аналгезија и неколку часа по завршување на процедурата но сепак важно е постоперативно да се постигне добра аналгезија. Кај деца тоа вообичаено се постигнува со супозитории парацетамол 2-3 пати во текот на првиот постоперативен ден.
Како заклучок барем од медицински аспект, должноста на лекарот е благосостојба на пациентот.
Родителите треба да разговараат со својот лекар за придобивките и ризиците на постапката пред да донесат одлука за обрежување на машко дете. Другите фактори, како што се вашата култура, религија и личен избор, исто така, ќе бидат вклучени во вашата одлука но секогаш треба да се добие стручно мислење од здравствен аспект кога се прави оваа процедура.
