Ако уживате да бојадисувате јајца, Велигден е на прагот, засукајте ги ракавите и набавете ги потребните намирници
Кому се потребни пакетчиња синтетички бои кога кујната изобилува со природни намирници со кои може да се бојадисаат разнобојни велигденски јајца? Бојадисувањето на јајца за празникот Велигден датира од многу одамна, но многу години пред да се појават пакетчињата синтетички бои на пазарите и во супермаркетите луѓето ги користеле основните намирници што ќе ги пронајдат во кујната за бојадисување на јајцата.
Можеби ви звучи комплицирано, но процесот на бојадисување на јајцата со боровинки, црвено вино, зелка или куркума е многу едноставен и практичен, а меѓу другото овозможува бојадисување на јајца на природен начин и со природни бои добиени од овошје и зеленчук. Ако уживате да бојадисувате јајца, Велигден е на прагот, засукајте ги ракавите и набавете ги потребните намирници. Процесот на бојадисувања јајца со кујнските намирници е многу лесен и едноставен. Она што ви е потребно се овошки и зеленчуци за посакуваните бои, вода, оцет и сол.
Важно е да се користат намирници со силни бои што ќе ги ставите да се варат во вода во којашто ќе додадете оцет и сол и во којашто потоа ќе ги ставите јајцата. Со намирниците може да експериментирате и со тоа да добиете различни комбинации на бои и нијанси што ќе се прелеат на јајцата.
Процесот на бојадисувањето на велигденските јајца со природни бои е малку подолг од оној со синтетички бои бидејќи на јајцата им треба подолго време да ја апсорбираат природната боја.
Во зависност од тоа какви нијанси на бои сакате да добиете, посветли или потемни, бојадисувањето би траело најмалку 30 минути. Доколку сакате да добиете јајца со светли, пастелни нијанси бојадисувањето би можело да трае пократко, додека доколку сакате силни, интензивни бои пожелно е да ги оставите јајцата во водата со намирниците преку цела ноќ.
Кои намирници можете да ги користите за посакуваните бои?
- Сино-тиркизна – виолетова зелка;
- Виолетова – црвено вино, сок од грозје или лушпи од црвен кромид;
- Розова – цвекло, замрзнати цреши или малини;
- Жолта – зачин од куркума, кора од портокал;
- Црвено-портокалова – морков, чили-зачин;
- Зелено-сина – зелена зелка и зачин од куркума;
- Сиво-сина – замрзнати боровинки;
- Златно-кафена – кафе;
- Зелена – спанаќ или магдонос.
