Киш со манури сирење кое совршено се вклопува со карамелизираниот кромид, печеното цвекло и оревите
Печено цвекло во салата со марула, рукола или млад спанаќ, сирење и јатки или семки и суви брусници, со прелив од маслиново, оцет балсамик и сируп од калинка е нешто неверојатно. Овој киш е со слични вкусови, особено интересен поради сирењето манури кое совршено се вклопува со карамелизираниот кромид, печеното цвекло и оревите.
Манури е грчко овчо сирење, мазно и несолено, не се топи и убаво се потпекува.
Тестото може да се направи како тоа за кишот со тиква, ама вака, со ореви и маслиново масло е посоодветно за филот со цвекло.
- 130 г интегрално грахам брашно;
- 70 г овесни снегулки;
- 50 г ореви;
- ½ лажиче сол;
- свежо мелен црн бибер;
- 4 лажици ладно цедено маслиново масло spiros;
- околу 60 – 90 мл ладна вода (или колку што е потребно).
Тестото можете да го направите рачно, со мешање со вилушка, или уште побрзо, во сецко. Ставете ги сите состојки во вангла или во сецко, почнете со 60 мл вода, па додајте уште ако треба. Промешајте со вилушка, сé да се спои убаво, или пуштете го сецкото да работи. Ако мешате рачно, прво исецкајте ги оревите ситно. Може да се направи ден – два однапред и да се чува во фрижидер.
- 2 – 3 средни кромида;
- сол и бибер;
- оцет балсамик (или сируп балсамик);
- црвено вино (ако имате);
- околу ½ кг цвекло;
- 50 г ореви;
- 150 – 200 г сирење манури;
- свежи магдонос и нане;
- 2 јајца;
- 125 мл кефир (или јогурт);
- околу 125 мл млеко (или уште кефир или јогурт)
Измијте го цвеклото убаво. Ставете фолија на дното на тавчето, ставете ги цвеклата, крупно исечени, неколку лукчиња, посипете со сол и бибер, ставете малку ладно цедено маслиново масло и малку оцет балсамик. Покријте го тавчето со фолија и ставете го цвеклото да се пече на 200°C, околу 40-60 минути, додека не омекне.
Во големо тавче загрејте на средно ладно цедено маслиново масло. Кромидот исечете го на тенки кришки и ставете го да се пржи полека, со малку сол и бибер. Кога малку ќе омекне, прелијте го со малку оцет балсамик и малку црвено вино ако ви се наоѓа, и оставете го да се готви додека течноста не испари и кромидот не е целосно омекнат, со повремено мешање.
Цвеклото и кромидот може да се подготват ден – два однапред. Потоа правењето на кишот би одзело многу малку време. Исто така, можете да испечете повеќе цвекло, кога веќе го печете, и да испржите повеќе кромид, па да ги искомбинирате во други рецепти.
Исукајте го тестото тенко и префрлете го во тавче со пречник околу 22 cm, премачкано со путер. или натапкајте го на дното и страните на тавчето, затоа што може да е ронливо и да не може да се исука. Ставете го да се пече празно, во рерна загреана на 175°C, околку 10 минути. Додека тестото се пече, излупете го цвеклото и исечете го на парчиња. Кога тестото малку ќе се потпече, во него прво ставете слој карамелизиран кромид, па коцки цвекло, крупно искршени ореви, свеж магдонос и нане и сирење манури.
Изматете ги јајцата со кефирот, сол и бибер и измерете ги, па дополнете ја течноста со млеко или уште кефир до 350 мл. Истурете ја смесата во кишот и вратете го во рерна да се пече уште 30 – 40 минути, или додека филот не е целосно зготвен. Оставете го кишот да се подолади пред да го послужите, а вкусен е и ладен следниот ден. Може да се направи и во мини тавче за мафини, нешто како мини питите со јаболка. Ставете по малку кромид и по едно парче цвекло, сирење манури и оревче во секоја чашка и дополнете ја со изматените јајца. Ваквите кишчиња се превкусни, само внимавајте, им треба многу помалку време за печење.
* рецептите со во целост преземени од ситно сецкано
