Ново откритие во медицината кое може да ги намали случаите на срцев или мозочен удар кои се предизвикани од згрутчувања во крвта
Благодарение на група истражувачи од Австралија – Baker IDI Heart and Diabetes Institute и универзитетот од Мелбурн – University of Melbourne случаите на срцеви или мозочни удари предизвикани од згрутчувања во крвта можат да бидат спречени навреме. Направена е капсула со големина на нано честичка која може интравенозно да се даде на пациент за да се лоцираат и уништат згрутчувањата во крвта кои може да бидат причина за срцеви или мозочни удари.
Најголем дел од случаите на срцеви или мозочни удари се резултат на ваквите згрутчувања кои ги блокираат артериите што носат крв до мозокот или срцето. Колку подолго се срцето или мозокот без кислород, толку се поголеми шансите за нивно откажување. Клучот лежи во што побрзото уништување на ваквите згрутчувања во крвта.
Оваа направа како новитет во областа на нанотехнологијата може да биде од огромно значење. Капсулата почнува да делува после неколку минути откако ќе биде дадена на пациентот. Предноста на оваа капсула споредена со сегашниот начин на справување со срцеви и мозочни удари е што капсулата делува брзо и е пренослива. Тоа значи дека ако има потреба може да биде искористена уште во амбулантната кола пред пациентот да стигне во болница, со што се заштедува значително време и се овозможува проток на крвта до критичните органи многу побрзо отколку претходно.
Лековите кои сега се користат при случај на срцев или мозочен удар може да предизвикаат и несакани ефекти кај некои пациенти. Еден од таквите несакани ефекти е внатрешното крварење што е исто така многу сериозен проблем.
Нанокапсулата делува на одреден начин – го одредува местото каде е згрутчувањето и го испушта лекот само на тие делови каде крвниот сад е блокиран.
Истражувачите работеле врз создавањето на оваа капсула во изминатите пет години, но според нив веројатно ќе треба да помине време од дополнителни пет години за да овој новитет во медицината може да биде употребуван и достапен за пациентите. Според нив, доколку оваа капсула се најде на пазарот би била особено значајна за справување со срцеви или мозочни удари на поефективен начин.
