Има голем број фитнес програми и вежби кои помагаат за подигнување на физичката подготвеност и губење на вишок килограми. Во последно време, возењето велосипед е се популарено. Оваа возбудлива физичка активност значително го забрзува метаболизмот со што се поттикнува трошење на вишокот калории, го регулира и намалува крвниот притисок, штити од коронарни срцеви заболувања и многу други болести. Со добар ритам и солидно темпо за еден час возење се трошат повеќе од 800 калории. Дури некои студии покажале дека луѓето кои возат велосипед до работа, првата година изгубиле околу 6 кг во просек.
Возењето велосипед како фитнес вежба мора да е во континуиран и фреквентен ритам затоа е важно да се избега од градскиот сообраќај. Кејот, а особено приградските места каде што нема многу сообраќај, имаат идеални услови за возење. За добар фреквентен ритам потребен е баланс помеѓу менувањето брзини и брзината на педалирање. Доколку при вртењето на педалите не возиме побрзо и одскокнуваме од седиштето или чувствуваме поголем напор при вртењето тогаш не сме во правата брзина. Идеално е 80 до 100 вртежи на педалата во минута броејќи го вртењето со едната нога. Со ова темпо добиваме добар кондиционен тренинг без да ги оптовариме зглобовите. За почеток доволно е половина час возење во овој ритам. Во првите денови на возење вообичаено е и воспаление на мускулите поготово на бутните, задната ложа, листовите па дури и вратот и рамењата. Со правилна исхрана и хидратација како и со подобрување на формата се минимизираат воспаленијата. Со подобрување на формата постепено се зголемува и растојанието и времетраењето на возењето. За поголемо трошење калории се препорачува возење кое е комбинација од периоди со нормално темпо на возење по кои следат нагли забрзувања и спринтови во интервали од 60-тина секунди. Искачувањето по ридест терен е уште еден добар кондиционен тренинг истовремено помага во зајакнување на мускулите. Комбинација од спринтови, искачувања и возење долги релации со нормално и континуирано темпо и ден одмор помеѓу е идеален начин за зголемување на издржливоста и физичката подготвеност како и брзо губење на вишокот килограми.
Летото е идеално време за возење велосипед. Доколку сеуште немате купено, овој практичен водич при купување велосипед ќе ви помогне да го направите вистинскиот избор.
