Промени во животниот стил клучен чекор во стабилизирање на метаболниот синдром
Покачените вредности на триглицериди, крвен притисок и гликоза, како и прекумерна акумулација на масно ткиво во абдоминалната област, заедно со низок HDL холестерол формираат група на состојби кои колективно се познати како метаболен синдром. Раното откривање и третман на метаболниот синдром има за цел превенција и/или третман на дијабетес мелитус тип 2, како и кардиоваскуларни заболувања: хипертензија, миокарден инфаркт, периферна артериска болест, мозочен удар итн.
За да се постави дијагноза метаболен синдром, потребно е да бидат исполнети најмалку три од следниве критериуми:
- Дебелина: обем на половината ≥ 102 cm кај мажи или ≥ 88 cm кај жени
- Триглицериди на гладно ≥ 1,70 mmol/L.
- Серумски ХДЛ холестерол < 9 mmol/L кај мажи, или < 1,1 mmol/L кај жени.
- Покачена гликемија на гладно ≥5,6 mmol/l, и/или нарушена толеранција на гликоза (7,8-11,1 mmol/L после оброк).
- Хипертензија, крвен притисок ≥130/≥85 mmHg.
Промени во животниот стил клучен чекор во стабилизирање на метаболниот синдром
Доколку метаболниот синдром се открие на време, третманот во принцип ќе биде нефармаколошки и ќе се базира на промени во животниот стил.
Основата е да се направи намалување на калорискиот внес преку намален внес на шеќери и масти, намалување на внес на токсини и зголемување на физичката активност и внес на протеини и зеленчук. Вообичаени прехрамбени совети се:
- Секојдневен внес на 2-3л вода, наместо газирани пијалаци со шеќер.
- Намалување на внес на алкохол.
- Престанок со пушење.
- Избегнување на внес на големи количини храна одеднаш а наместо тоа 3-5 помали оброци дневно.
- Редовна физичка активност во траење од најмалку половина час на ден. Користење на скали наместо лифт, пешачење или возење велосипед до работа наместо користење автомобил. Целта треба да биде најмалку 10 000 чекори дневно.
Примена на додатоци во исхраната при метаболен синдром
Во стабилизирање на целните вредности може да придонесат и одредени додатоци на исхраната вклучувајќи банаба, поликзанол, холин, монаколин К, артичока, пробиотици итн.
Поликозанолот е исклучително ефикасен во намалувањето на нивото на лошиот ЛДЛ холестерол во крвта и го намалува нивото на триглицериди, а од друга страна го зголемува добриот ХДЛ – холестерол. Холинот ,од своја страна, придонесува за нормален метаболизам на липидите и хомоцистеинот како и за одржување на нормална функција на црниот дроб.
Банаба придонесува за одржување на нормален метаболизам на гликоза/јаглехидрати, како и за одржување на нормална телесна тежина. Исто така, витамините и минералите кои се вклучени во метаболизмот на гликозата и чиј недостаток е поврзан со зголемен ризик од дијабетес, како што се цинк, магнезиум, хром, витамин Б1 и витаминот Д, неопходно е да бидат во рамки на препорачаниот дневен внес.
Доколку со овие мерки не се постигнат задоволителни резултати се прибегнува кон фармаколошка терапија. Фармаколошкиот третман подразбира лекување на поединечните компоненти од синдромот. Тоа значи вклучување на антихипертензивна, антидијабетична и антилипемична терапија по препорака од лекар.
