Симптомите на трите типови хепатитис може да вклучат: замор, гадење, слаб апетит, болки во стомакот, блага треска или жолтица.
Хепатитисот е воспаление на црниот дроб коешто може да биде предизвикано од лекови, употреба на алкохол или одредени медицински состојби. Но, во повеќето случаи, хепатитисот е предизвикан од вирус. Оваа состојба е позната како вирусен хепатитис, а најчестите форми се хепатитис А, Б и Ц.
Симптоми на хепатитис
Кај лицата заболени од хепатитис понекогаш е можно да не се појават симптоми на хепатитис во првите недели од инфекцијата, односно акутната фаза и со тоа болните воопшто да не бидат свесни за својата болест. Но кога ќе се појават симптомите на трите типови хепатитис може да вклучат: замор, гадење, слаб апетит, болки во стомакот, блага треска или жолтица. Кога типовите хепатитис Б и Ц стануваат хронични, тие може со години да не предизвикаат никакви симптоми.
Што претставува и како се пренесува хепатитис А
Хепатитисот А е многу заразен и може да се шири од човек на човек во многу различни услови. Овој тип обично предизвикува само благо воспаление, а многу луѓе кои се инфицирани може и да не знаат дека биле болни. Вирусот речиси секогаш сам се губи и не предизвикува долгорочно оштетување на црниот дроб. Хепатитисот А обично се шири преку храна или вода. Вирусот може да се пренесе на храната може да се извалка кога ќе биде допрена од лице со хепатитис А кое не ги измило рацете по користење на тоалетот.
Што претставува и како се пренесува хепатитис Б
Многу возрасни кои се болни од хепатитис Б имаат благи симптоми коишто траат кратко време и потоа стануваат подобри сами по себе. Но некои луѓе не можат целосно да го излечат вирусот што може да предизвика долгорочна инфекција. Речиси 90% од доенчињата на кои се пренел вирусот го носат цел живот. Со текот на времето, хепатитисот Б може да доведе до сериозни проблеми, како што се оштетување на црниот дроб, откажување на црниот дроб и рак на црниот дроб. Хепатитисот Б може да се пренесе преку контакт со крв или телесни течности на заразено лице. Во САД, најчесто се шири преку незаштитен секс. Исто така, вирусот може да се пренесе преку споделување игли, жилети или четка за заби со инфицирани лица. Бремените жени коишто имаат хепатитис Б, може да го пренесат вирусот на своето бебе за време на породувањето. Хепатитис Б не се шири со гушкање, споделување на храна или кашлање.
Што претставува и како се пренесува хепатитис Ц
Околу 25% од луѓето коишто заболуваат од хепатитис Ц го победуваат вирусот по краткотрајна инфекција. Остатокот го носи вирусот во своето тело долг период. Хроничниот хепатитис Ц може да предизвика многу сериозни компликации, вклучувајќи ја и хепаталната инсуфициенција и ракот на црниот дроб. Сепак, постојат ефикасни третмани за вирусот. Хепатитис Ц се шири преку заразена крв. Ставањето на тетоважа или пирсинг на телото со инфицирана игла е уште едно средство за изложеност. Бремените жени коишто се заболени од вирусот, исто така, може да го пренесат на своето дете на раѓање. Во ретки случаи, незаштитениот секс шири хепатитис Ц, но ризикот е мал. Се чини дека повеќе сексуални партнери, ХИВ или груб секс го зголемуваат ризикот за ширење на хепатитис Ц.
Компликации од хепатитис
Цироза
Една од најчестите компликации на хроничниот хепатитис е цироза. Цирозата ја отежнува работата на црниот дроб и може да доведе до оштетување на црниот дроб, состојба која е опасна по живот. Симптомите вклучуваат замор, гадење, губење на тежината и отекување во стомакот и нозете.
Рак на црн дроб
Вирусниот хепатитис е главната причина за рак на црниот дроб, така што луѓето со хроничен хепатитис Б или Ц треба да одат на редовни прегледи и да ги следат состојбите, дури и ако се чувствуваат здрави. Тестовите на крвта можат да ги детектираат протеините кои укажуваат на присуство на рак на црниот дроб. Ултразвуците, КТ-скенирањата и МРИ можат да откријат абнормални лезии на црниот дроб, а биопсијата е начин кој овозможува да се утврди дали овие лезии се канцерогени. Туморите кои се детектираат рано може да бидат хируршки отстранети.
