Во „Journal of Pediatric Gastroenterology and Nutrition“ беа објавени две нови научни студии кои ги истакнуваат потенцијалните опасности од трендовските фиџет-спинери по здравјето на децата.
Одржувањето на здравјето на децата е врвен приоритет на секој родител. Оттука, кога стануваат збор детските играчки, вообичаено родителите внимаваат играчките што ќе ги купат за своето дете да се произведени од компании коишто се стремат своите производи да се одликуваат со врвен квалитет и притоа да се безбедни за употреба.
Токму овие компании ги произведуваат своите играчки почитувајќи многу безбедносни стандарди со цел да обезбедат производство на играчки што ќе бидат соодветни за одредена детска возраст, како и безбедни доколку се користат правилно. Меѓутоа, понекогаш, играчките може првично да изгледаат безбедни за користење, но понатаму да резултираат со проблем што може да му наштети на здравјето на децата. Едни од навидум безбедните детски играчки се оние коишто содржат магнети и литиумски батерии.
На веб-страницата на „Северноамериканското здружение за педијатриска гастроентерологија, хепатологија и исхрана“ се истакнува дека околу половина од сите деца што ќе проголтаат силен магнет ќе подлежат на операција за отстранување, а приближно една третина ќе страдаат од перфорации на дебелото црево. Останатите, пак, може да настрадаат од повреди што ќе резултираат со доживотни компликации.
Со стапувањето на сила на нови безбедносни стандарди за силните магнети што се содржани во некои детски играчки, во 2015 година се забележува намалување на бројот на повредени деца. Неодамнешните истражувања може да бидат поттик за поставување на безбедносни стандарди и за трендовските фиџет-спинери, за коишто се зборува дека можат да ја намалат анксиозноста кај луѓето со АДХД. Но, сепак, уште не постојат истражувања што би го потврдиле ова позитивно влијание кај децата или возрасните коишто страдаат од оваа состојба.
Трендовските фиџет-спинери се едноставни играчки, вообичаено составени од три делови кои се вртат околу централна оска. Некои од нив вклучуваат и диоди за коишто се потребни литиумски батерии за да емитуваат светлина. Според последните студии објавени во „Journal of Pediatric Gastroenterology and Nutrition“, токму овие батерии може да претставуваат ризик за здравјето на децата.
Во првиот труд, тимот автори, д-р Раша Калаф од „Children’s Hospital Colorado“ и д-р Јозеф Гуревич од „Steven and Alexandra Cohen Children’s Medical Center“, опишува два случаи на деца, 3-годишно момче и 4-годишно девојче, кои ги проголтале батериите од скршени фиџет-спинери. Во двата случаи, ингестијата на литиумските батерии предизвикала длабоки езофагеални изгореници. Имено, на момчето му била потребна итна ендоскопија за отстранување на батеријата, по што останало во болница речиси 3 недели поради загриженоста дека може да се развие фистула помеѓу хранопроводот и аортата. Фистула, всушност, е абнормална врска помеѓу два простори во телото којашто може да биде опасна по живот.
Вториот труд ги опишува повредите предизвикани од внесување на други делови од фиџет-спинерите кои не ги вклучуваат литиумските батерии. Како и во случаите од првиот труд, наведени погоре, проголтаните деловите биле отстранети со итна ендоскопија.
Литиумските батерии се користат во голем број уреди за домаќинство, а нивното проголтување е опасно по здравјето. Поконкретно, кога литиумската батерија доаѓа во допир со телесни течности, таа може многу брзо да предизвика повреда. Кога стануваат збот литиумските батерии, според „National Capital Poison Center“, во САД во последниве години се зголемил бројот на случаи на деца што проголтале батерии, од кои 36 резултирале со смрт.
Оттука, авторите на двете студии препорачуваат голема претпазливост при играњето со фиџет-спинерите.
