Ново истражување од Женева тврди дека алуминиумот којшто вообичаено го содржат дезодорансите и антиперспирантите може да придонесе во појавата на тумор на дојка
Научната дебата на темата дали антиперспирантите и дезодорансите содржат состојки коишто може да предизвикаат рак на дојка со децении не запира. Ново истражување спроведено на Универзитетот во Женева, Швајцарија, произлезе со нови тврдења дека алуминиумските соли, дел од состојките што ги содржат дезодорансите и антиперспирантите, може да бидат причинители за формирање на малигни тумори на дојка.
Со ова истражување водено на Женевскиот Универзитет, научниците тврдат дека долгорочната изложеност на концентрацијата на алуминиумски соли, активните состојки што ги блокираат потните жлезди, може целосно да ги трансформира млечните епителни клетки и оттука да поттикне формирање на малигни тумори што преминуваат во рак што метастазира.
Водачот на истражувањето и професор по онкологија на универзитетот во Женева, Андре-Паскал Сапино, ги споредува алуминиумските соли со азбестот, природен минерал за кој е докажано дека со директна изложеност и долговремена инхалација може да предизвика рак на белите дробови.
„Азбестот е евтин и има атрактивен индустриски потенцијал поради што беа потребни речиси 50 години за да се забрани неговата употреба во земјите во Европската Унија. Се надеваме дека нема да биде потребно толку долг временски период за да се забранат алуминиумските соли“, изјави Сапино.
Сепак овие тврдења во текот на долгогодишните истражувања и научни дебати се жестоко демантирани од страна на експерти коишто тврдат дека нема дефинитивна поврзаност помеѓу употребата на антиперспирантите и појавата на рак на дојка.
„Секоја имплицирана поврзаност помеѓу алуминиумот во козметиката и појавата на рак на дојка е неточна. Сите студија и истражувања спроведени во последните 20 години од страна на научни и здравствени органи низ целиот свет не докажале поврзаност помеѓу алуминиумските соли во дезодорансите и антиперспирантите со ракот на дојка. Неодамна, Научниот Комитет за безбедност на потрошувачите од Европската комисија, ја истражи безбедноста на алуминиумот во антиперспирантите и заклучи дека не постојат веродостојни докази дека оваа состојка може да го зголеми ризикот од било каков тип на рак“, посочи Дарен Празник, претседателот на организацијата Canadian Cosmetic, Toiletry and Fragrance.
Празник го посочува и фактот дека дезодорансите и антиперспирантите всушност ги блокираат потните жлезди, а не пенетрираат во нив.
Тој вели дека кога антиперспирантот се нанесува на површината на кожата се разложува во потта и формира гел што само привремено ги блокира потните жлезди и не навлегува во нив или во крвотокот. На ова мислење се надоврза и Канадската организација Canadian Cancer Society којашто тврди дека сите досегашни многубројни студии, темелно ги истражиле и разгледале сите страни на оваа научна дебата и покажале дека употребата на дезодоранс не е ризик за заболување од рак на дојка.
