Едно ново научно истражување покажува дека третманот со новосоздадениот синтетички канабиноид ги редуцира дефектите во `рскавицата предизвикани од остеоартритис
Наодите од истражувањето од месец април оваа година објавено во Американската национална библиотека на националниот медицински институт за здравје – US National Library of Medicine National Institutes of Health се совпаѓаат со досегашното практично искуство на пациентите што сугерира дека благодарение на своите благо аналгетски и противвоспалителни својства, канабиноидите може да помогнат во борбата со остеоартритисот или евентуално да ги ублажат болките, непријатноста и негативните симптоми од ова дегенеративно заболување на зглобовите.
Синтетичкиот канабиноид WIN-55 создаден е од страна на човекот во лабораторија по хемиски вештачки пат и во формата во која што е создаден го нема во ниту едно органско растение, ниту пак некаде во природата. Тој е агонист на CB1 рецепторите во нашиот ендоканабиноиден систем што секој од нас го поседува. Оваа алтернатива е развиена како можен нестероиден антиинфламаторен лек и хемиски гледано, има многу мала сличност со природниот тетрахидроканабинол – THC што во големи концентрации го има во зрелите цветови на канабисот, со што се избегнува психотропниот ефект.
Постојат два главни типа на артритис и тоа остеоартритис и ревматоиден артритис. Остеоартритисот е почеста и помалку тешка форма на болеста и како што покажува статистиката, од оваа хронична појава страдаат повеќе од 20 милиони Американци. Распаѓањето на заедничката заштитна `рскавица во зглобовите може да биде предизвикано од многу причини: наследен фактор, дебелина, повреда…
Покрај многуте досегашни студии што исто така ја потврдуваат корисноста на канабиноидите, сè уште не постојат доволно научни докази дека канабисот е добар лек за ова заболување и за други заболувања, пред сè поради малите размери на студиите.
„Науката сега веќе истакнува дека компонентата THC од канабисот е доста ефикасен аналгетик. Состојката CBD (Канабидиол) има уникатни имуномодуларни придобивки и го поддржува лекувањето на артритисот“ – уште во 2005 година истакна д-р Етан Русо – Ethan Russo, невролог кој е ангажиран како главен медицински советник за GW Pharmaceuticals и воедно е претседател на Меѓународното истражувачко општество за канабиоиди. Тој е еден од најпознатите и најпосветените истражувачи на медицинскиот канабис во САД, поборник за употребата на канабис кај повеќе здравствени состојби, не само за артритисот.
„Постојат доста експериментални докази што покажуваат дека канабисот може да биде ефикасен во третирањето на болките кај артритисот, како и воспалението и помошта со заморот“ – објаснува д-р Џејсон Мекдугал – Jason McDougall, професор по фармакологија и анестезија и претседател на Scientific Advisory Committee of the Arthritis Society. „Понатамошни истражувања за медицинскиот канабис се неопходни за да ги разбереме различните подгрупи на пациенти кои можат да се лекуваат со медицински канабис“ – додава тој.
