Дознајте како правилно треба да се третира свежа тетоважа, но и што треба да направите пред и после тетовирање. Правилната нега е клучна за здрава кожа и што подолготрајна убавина на вашето уметничко дело
Тетовирањето претставува вид на уметничка форма на себеизразување и покажување став и препознатливост. Сепак, не е доволно само да се одлучите да направите тетоважа и каква. Оваа одлука има повеќе различни аспекти на кои нужно треба да им се посвети внимание. Од избор на мајстор за тетовирање, па сè до нeга по тетовирањето и долготрајна грижа, сè е важно. Исто така, треба да бидете информирани за сите можни последици за вашето здравје, кои што ги носи тетовирањето.
Подготовки пред тетовирање
- Одете во регистриран салон за тетовирање. Професионално студио работи по стандарди и ги има поминато сите инспекции за соодветни хигиенски услови.
- Доколку сте на некаква терапија, најпрво консултирајте се со лекар. Внимавајте да не пиете аспирин претходно, бидејќи аспиринот го спречува згуснувањето на крвта. Тетовирањето е строго забрането кај оние со болести на крвта и крвните садови, болни од епилепсија и дијабетес. Консултирајте се со вашиот лекар доколку патите од хемофилија, алергија на метали, проблеми со притисокот или доколку сте бремени. Задолжителна консултација со лекар и доколку вашата кожа е премногу чувствителна.
- Процесот може да трае и неколку часови, така што треба да бидете наспани, најадени и хидратирани. Понесете со себе вода и некоја здрава ужина, доколку правите голема тетоважа која ќе трае неколку часа. Не консумирајте алкохол 24 часа пред тетовирањето.
Запомнете: Како и пред секоја интервенција врз вашето тело, не постои прашање кое е непотребно или глупаво. Професионалец треба да има одговор за секое ваше прашање.
Нега на кожата после тетовирање
Со правилна нега, тетоважата ќе заздрави во периодот од една до две недели, во зависност од нејзината големина. Непосредно по тетовирањето, местото треба да се заштити со газа, која треба да се носи првиот ден, за да ја впие бојата и вишокот течност од тетоважата. Често на тетоважата се става и фолија за заштита од надворешни влијанија, но доколку сте дома, избегнувајте фолија, бидејќи со неа кожата не „дише“.
- Практикувајте премивки неколку пати дневно со медицински сапун кој има благо дејство, со цел да се избегне инфекција. Водата треба да биде млака, никако жешка. Избришете со лесно тапкање со чиста крпа. После првиот ден, ако газата е малку залепена кога ќе ја вадите, нанесете прво малку млака вода, па извадете ја, никако со напор, бидејќи на тој начин ризикувате оштетување на тетоважата.
- Користете средства соодветни за нега после тетовирање. Избегнувајте да користите вазелин, колку и да ви звучи логично за да не се суши раната. Ваквата маст ги затнува порите. Никако не нанесувајте алкохол, туку крем или прашок за таа намена. Што помал контакт на тетоважата со надворешни влијанија, предмети или допирање на местото, толку подобро, бидејќи колку добро и да изгледа, сепак станува збор за иритација на кожата односно рана која треба соодветно да се лекува за да зарасне. Токму затоа, за соодветна нега добра опција е прашок, бидејќи лесно се аплицира без да ја допре раната.
- Доколку дојде до инфекција, треба директно да се делува врз неа, па така, соодветен прашок ќе го апсорбира ексудатот на раната и ќе ја заштити од секундарна инфекција, но и од оштетување. Исто така, соодветно средство треба да делува без намалување на дејството при допир со секрети или крв. Целта е да се создаде заштитен слој на површината и да се забрза заздравувањето.
- Избегнувајте поголем допир со вода како капење во када, базен или езеро. Сончање и солариуми се строго забранети.
- Некое време после тетовирањето, при процесот на регенерирање на кожата, таа станува тврда кора која постепено почнува да се лупи и заздравува. Никако не го допирајте месото со нечисти раце и ја отстранувајте кората.
- Избегнувајте прекумерно потење, така што, доколку сте активни во салата за вежбање, направете еднонеделна пауза.
- Не носете припиена облека од синтетички материјали за да избегнете чешање. Никако не се чешајте. Облеката нека биде широка и од природни материјали. Поголем предизвик е доколку тетоважата се наоѓа на нога. Тоа значи дека нема да носите чевли една недела.
- Обидете се да не спиете на страната каде што е тетоважата.
Долготрајна и постојана нега
Здравата и хидрирана кожа е најважна. Затоа внимавајте кожата никогаш да не ви биде сува, особено на оние места на телото на кои тетоважите побрзо избледуваат (дланки, стапала, лакти). Големите нагли промени во телесната тежина може да го променат изгледот на тетоважата. Секогаш кога директно се изложувате на сонце, задолжително нанесете крем со најмалку 30 УВ фактор. Сонцето со тек на време ја избледнува бојата на тетоважата, па така, доколку сакате вашето уметничко дело да биде убаво долго време, негувајте ја тетоважата со тоа што секојдневно ќе се грижите за здравјето на вашата кожа.
