Се одржа „Виолетовиот ден“

Во саботата се одржа настанот „Виолетов ден“ со пригодни манифестации во Скопје и Прилеп со цел подигнување на свеста за епилепсијата и поттикнување на прашањето за инклузија во општеството на лицата со епилепсија

На 26 март, Македонија го одбележа „Виолетовиот ден“- Меѓународен ден за поддршка на лицата со епилепсија. Со слоганот „РАЗЛИЧНИ А СЕПАК ИСТИ“, „Лигата за борба против епилепсија на Македонија“, заедно со здружението „Епилепсија Македонија“, го одбележаа овој ден во Скопје и во Прилеп. Со овој настан, Македонија се приклучува на светската иницијатива за подигнување на свеста за епилепсијата.

„Виолетовиот ден“ започна во 12 часот на градскиот плоштад „Македонија“ во Скопје, а продолжи во 17 часот во „Скопје Сити Мол“, каде што беше одржано едукативно предавање за епилепсија и се разговараше за проблемите со кои се соочуваат овие лица. На случувањето, својата поддршка ја дадоа неколку македонски ѕвезди. Во Прилеп, „Виолетовиот ден“ се одбележа на градскиот плоштад „Методија Андонов Ченто“ во 11 часот, каде што се одржаа пригодни манифестации.

Од „Лигата за борба против епилепсија во Македонија“, посочија за важноста на подигање на свеста на граѓаните во врска со ова прашање. Неврологот, Татјана Чепреганова-Чанговска, членка на организацијата, истакна дека е во пораст бројот на луѓе кои страдаат од епилепсија. Имено, во Македонија, приближно 25 000 лица живеат со епилепсија, со тенденција за пораст на оваа бројка.

Од Здружението „Епилепсија Македонија“, истакнаа за борбата против дискриминацијата на граѓаните со ова нарушување. Се покрена прашањето за нивните нерешени проблеми и двојниот стандард при нивната класификација како инвалиди.

Имено, при вработување, лицата со епилепсија се третираат како инвалиди, додека пак, кога ќе аплицираат за инвалидска пензија, ги одбиваат со образложение дека епилепсијата не е болест и дека не им следува инвалидска пензија.

Настанот беше поддржан од CIVICA Mobilitas, Општина Прилеп, Кабинетот на Претседателот на Република Македонија и Skopje City Mall.

На овој ден, луѓето од целиот свет носат виолетова боја за да дадат поддршка на лицата со епилепсија. Епилепсијата е четврто најчесто невролошко нарушување и го зафаќа луѓето на секоја возраст. Начинот на кој овие луѓе се перцепирани и прифатени, во некои земји сè уште се смета за стигма, и претставува поголем проблем отколку справувањето со самото нарушување. Токму затоа, на 26 март во повеќе земји од светот, беа одржани бројни манифестации, едукативни предавања и разни активности.