Доколку добиете лек во рок од 4,5 часа од вашите први симптоми, може да го намалите ризикот од долготрајна неподвижност како последица од мозочен удар.
Честопати ни се случува да забележиме некој симптом или да почувствуваме болка во некој дел на телото коишто на крајот заради многу причини ќе решиме да ги игнорираме. Многу симптоми или знаци на болка и потешкотии во некој дел од телото може и да не бидат сериозни и опасни по нашето здравје, но, сепак, некои типови на болка не треба да се игнорираат бидејќи може да влијаат на нашето понатамошно здравје и да го зголемат ризикот од сериозни заболувања. Следниве симптоми и типови на болка се помеѓу оние коишто може да бидат знак дека треба да внимавате на здравјето и да го посетите вашиот доктор.
Слабост во рацете, нозете и лицето
Чувството на слабост или вкочанетост во вашите раце, нозе или лице, особено ако ги чувствувате од едната страна од вашето тело, може да бидат знак на мозочен удар. Исто така, мозочниот удар може да предизвика проблеми со рамнотежата и движењето, проблеми со зборувањето и разбирањето, како и вртоглавица.
Доколку почувствувате некои од овие симптоми веднаш повикајте го вашиот доктор бидејќи доколку добиете лек во рок од 4,5 часа од вашите први симптоми, може да го намалите ризикот од долготрајна неподвижност како последица од мозочен удар.
Болка во градите
Секоја болка во градите, особено онаа придружена со зголемено потење, висок притисок, отежнато дишење или гадење, треба веднаш да се провери од страна на медицинско лице.
Болката или притисокот во градите може да биде знак на срцеви заболувања или срцев удар, особено доколку ги почувствувате за време на напор или додека сте активни.
Болка во задниот долен дел од нозете
Оваа болка може да биде симптом на згрутчување на крвта во вашата нога, познато како венска тромбоза, кое што може да се појави по долго време поминато во седечка или лежечка положба. Доколку ви се појави згрутчување на крвта во задниот долен дел од нозете, болката би ја почувствувале додека ќе стоите или шетате. Може да се појави и оток, а ногата ќе ви биде црвена, отечена и чувствителна на допир.
Крв во урината
Појавата на крв во урината може да биде поврзана со повеќе состојби, меѓу кои и камен во бубрегот, инфекција на мочниот меур или бубрезите. Каменот во бубрег претставува мал кристал од минерали и соли кои се формираат во бубрегот и се движат низ цевката која ја носи урина. Оттука, доколку забележите крв во урината и истовремено чувствувате голема болка во половината или во грбот може да станува збор за камен во бубрег. Доколку, пак, забележите крв во урината и истовремено имате постојано големено чувство дека треба да уринирате или чувствувате печење кога уринирате, може да имате инфекција на мочниот меур или бубрезите. Во двата случаи важно е да се консултирате со вашиот доктор.
Свирење во градите
Доколку слушате звук на свирење во градите додека дишите веднаш посетете го вашиот доктор. Свирењето во градите може да се појави како последица од астма, воспаление на белите дробови или алергија. Вашиот доктор може да препознае за што станува збор и како да се третира. Доколку страдате од алергиска астма, консултирајте се со специјалист за алергии или пулмолог кој ќе ви помогне во третирањето на проблемот.
