Виолетовиот ден има за цел да ги поттикне луѓето да зборуваат за епилепсија и да ги потсетат оние што живеат со напади, дека не се сами
26-ти Март, таканаречен виолетов ден, е светски ден за поддршка на луѓето со епилепсија, кој се одбележува преку повеќе активности, на сите континенти, со носење на виолетовата боја. Виолетовата боја е одбрана како боја на епилепсијата, која се поврзува со чувството на осаменост, како резултат на општествената стигматизација и маргинализација на лицата со епилепсија.
Што е епилепсија?
Епилепсии се голема група на невролошки заболувања, чија карактеристика е појава на повторувачки, непровоцирани епилептични напади. Епилептичните напади се транзиторни пореметувања во мозочната функција, кои се резултат на зголемена електрична активност во мозочната кора. Постојат многу ралзични типови на епилептични напади и различни видови на епилепсии. Преваленцата на епилепсијата е 0.5 – 1 % од вкупната популација, што значи околу 15000 -20000 луѓе со епилепсија во Р. Македонија. Се смета дека повеќе од 50 милиони луѓе во светот имаат епилепсија. Две третини од заболените, со соодветна терапија имаат добро контролирани напади.
Што претставува Лигата за борба против епилепсија на Р. Македонија?
Лигата за борба против епилепсија на Р. Македонија е професионално здружение, кое е дел од Интернационалната лига за борба против епилепсија. Нејзината цел е унапредување на знаењето за епилепсијата и подобрување на грижата за луѓето болни од епилепсија.
Што е Виолетов ден?
Виолетовиот ден, 26 март, веќе неколку години се обележува во многу земји во светот во знак на подршка на лицата со епилепсија. Целта е да се подигне свеста за епилепсијата, како и да се намали стигмата и предрасудите кои ја опкружуваат оваа болест. Лигата за борба против епилесија на Македонија заедно со Здружението на граѓани за лица со епилепсија и родители на деца со епилепсија, традиционално, веќе трета година по ред, ќе го одбележат овој ден со „обојување“ на Македонија во виолетово.
По тој повод ве покануваме на 26 Март во 12 часот на Плоштад Македонија, пред книжарa „Култура“ заеднички да ја обоиме Македонија во виолетово.
Доц. д-р Емилија Цветковска – Претседател на лигата за борба против епилепсија на Р. Македонија
