Туберколоза – тивок убиец, од кого сеуште заболуваат илјада лица дневно
Туберкулозата се уште претставува глобален медицински проблем пред се во неразвиените земји и земјите во развој. Денес, една третина од светската популација е инфицирана со туберкулозниот бацил. Кај 10% од инфицираните во текот на животот се развива болест.
Според податоците на Светската здравствена организација, секоја година во светот се регистрираат над 8 милиони нови случаи на туберкулоза, а умираат над 2 милиони.
Туберкулозата е втора водечка причина за смрт меѓу инфективните болести во светот, веднаш по ХИВ инфекција. За решавање на проблемот со туберколозата Светската здравствена организација уште од 1993 година води стратегија наречена партнерство за стоп на туберколозата која се применува во 157 земји во светот. Целта на стратегијата е да се намали бројот на заболени, а болеста да биде искоренета до крајот на 2050година. Туберкулозата е излечива болест што ја предизвикува инфекција со бактеријата Mycobacterium tuberculosis. Болеста обично ги зафаќа и оштетува белите дробови, меѓутоа може да се пренесе и да оштети и други делови од телото, како, лимфните жлезди, бубрезите, коските, р’бетот, мозокот итн. 
Туберкулозните бактерии се пренесуваат преку воздухот кога лицето болно од туберкулоза во белите дробови или грлото, кашла, кива, пее или зборува, испуштајќи мали капки во воздухот. Секое лице во близина може да ги вдише овие бактерии и на тој начин да се разболи. Но повеќето луѓе се заразуваат со туберкулоза од лице со кое поминуваат многу време заедно. Туберкулозата не се пренесува преку предмети што се користат во домаќинството, на пример, прибор за јадење, исти садови и чинии, телефон или пак преку бакнеж. Лицата кои имаат туберколоза најчесто ги имаат следните симптоми:
- Се чуствуваат физички слаби или болни
- Брзо губат телеса тежина
- Кашлаат (понекогаш со крв) и имаат болки во градите
- Имаат треска
- Се потат преку ноќ
- Или понекогаш немаат никакви симптоми
Има два вида на туберкулоза активна и притаена. Лицата кои имаат активна туберкулоза се болни од големиот број на бактерии на туберкулоза кои се активни во нивното тело. Лицата кои имаат притаена туберкулоза исто така ги имаат бактериите кои предизвикуваат активна туберкулоза, меѓутоа тие не се болни затоа што бактериите се латентни (притаени) во нивното тело. Обично, овие лица биле изложени на бактериите на туберкулоза во минатото. Меѓутоа, притаената туберкулоза кај овие лица може да премине во активна туберкулоза во иднина.
| Ако имате активна туберколоза, тоа значи дека: | Ако имате притаена туберколоза, тоа значи дека: |
| имате бактерии на активна туберколоза во вашето тело | имате бактерии на туберколоза, но тие не се активни |
| Сте болни и може да имате симптоми, на пример: кашлате, имате треска, слабеете, чуствувате умор и се потите преку ноќ | Не сте болни |
| Можеби можете да им пренесете бактерии на туберколоза на други лица | Не можете да ги пренесувате бактерии на туберколоза на други лица |
| Може да примате лекарства за да се излечите од болеста | Може да примате лекарства за да спречите да се разболите од туберколоза во активна форма во иднина |
Ако навреме не се започне со лекување активната туберкулоза може да предизвика сериозни здравствени проблеми и да доведе дури и до смрт предупредуваат лекарите. Според последните податоци во Европа дневно заболуваат по илјада лица.
За лекарите најзагрижувачки е податокот за лекувањето на туберкулозата, бидејќи таа станува се поотпорна на лекови. Според проценките на Светската здравствена организација бројката на заболени лица од туберкулоза отпорна на лекови ќе достигне околу 2 милиони луѓе во светот.
Држави што имаат најголем број заболени се Кина, Виетнам и Филипини. Туберкулозата исто така се нарекува и болест на сиромаштијата. Најчесто ја напаѓа младата популација од населението во нивните најпродуктивни години. Деведесет и пет отсто од туберкулозните смртни случаи се во земјите каде има глад. Туберкулозата во светски рамки е на трето место како причина за смрт кај жените во репродуктивниот период и четврто место како причина за смрт кај жените од сите возрасти. Повеќе од половина милион жени умираат од туберкулоза секоја година.
