Долната облека и костимите за капење се помеѓу најнечистите парчиња облека
Секому му се случило барем еднаш да купи ново парче облека и да го облече пред да го испере. Понекогаш кога ќе пронајдеме кошула во омилената боја или пар фармерки што одлично ни прилегаат, задоволството е големо што нè прави нетрпеливи и сакаме што поскоро да ги облечеме. Облекувањето нова, штотуку купена облека без да се испере е многу честа навика, за некој дури и вообичаена, особено кога станува збор за парче донесено директно од магацин за кое сметаме дека е чисто бидејќи најверојатно претходно воопшто не било пробувано.
Но многу истражувања и тестирања спроведени од страна на експерти, докажуваат дека и онаа облека чувана во магацин е подеднакво нечиста, како и онаа ставена на полиците во продавниците и дека нејзиното неперење може да предизвика иритација на кожата, појава на алергии, како и многу други инфекции што се лоши за нашето здравје. Лана Хог, експерт во производството на облека, за модниот магазин Elle, потенцира дека неперењето на новата облека ја изложува осетливата кожа на сите фабрички процеси низ кои поминува облеката кога се произведува.
Таа вели дека голем број од парчињата облека содржат разни бои и хемикалии коишто можат да предизвикаат проблеми со човечкото здравје.
Филип Тиерно, директорот на одделот за Микробиологија и имунологија на Универзитетот во Њујорк, по спроведените тестирања на различни парчиња облека, докажа дека долната облека и костимите за капење се помеѓу најнечистите парчиња облека за кои е препорачливо воопшто да не се пробуваат и задолжително да се исперат пред да се носат. Овие парчиња облека може да носат со себе широк спектар на бактерии што во најлош случај може да предизвикаат уринарни или вагинални инфекции. Долната облека, костимите за капење, како и сите останати парчиња облека како кошули, блузи или пантолони може да „закачат“ и респираторни секрети, кожна флора, фекална флора и др. што може да влијаат на човечкото здравје.
Меѓудругото, Лана Хог вели дека во процесот на производство на облеката често се додаваат формалдехид или анилински бои со целта да му се продолжи векот на материјалот од којшто е изработена. Овие додатоци што ја прават облеката подолготрајна и што ја „штитат“ од избледување, доколку оној што ја носи е алергичен, може да предизвикаат црвенило, печење или чешање на кожата, како и други посериозни алергиски реакции или иритации, меѓу кои и дерматит.
