Утре, 30 октомври, со почеток од 11 часот, во Младинскиот културен центар во Скопје ќе се одржи петтото издание на „Вегефест“
Под мотото „Револуција која почнува во твојата чинија – за права на животните!“ здружението за заштита на животни „Анима мунди“, го најавува петтото издание на „Вегефест“. Организаторите истакнуваат дека со „Вегефест“ повикуваат на сочувствителност, хуманост и разум, секој од нас да даде шанса на животниот стил без насилство, започнувајќи од себе, односно од својата исхрана.
Програмата на овогодинешниот „Вегефест“ е богата и разновидна, со фокус на бројни предавања за важноста на веганството од повеќе аспекти. Воедно, ќе има спортски и забавен дел, штандови со веганска храна и производи, уметничка изложба и музички концерти на: Мугер Фугер, Тина, Васко, Дени од Бернајс Пропаганда, Субстандард трио, Перија, Дј Милан Бибановски и Чадик и акробатите Фаз Бабл. Фестивалот ќе понуди и богато детско катче со едукативни работилници за деца.
„Со овие мали чекори можеме да направиме големи и значајни промени за подобро на сите: животните, луѓето, екосистемот и планетата Земја. Нашиот апел до секој еден е да не биде пасивен консумент и да го бојкотира и осуди насилството врз животните со тоа што ќе ѝ даде шанса на веге исхраната“, велат од „Анима мунди“.
Настанот ќе се одржи на 30.10.2016 во МКЦ во Скопје, со почеток од 11 часот, а влезот е слободен.
