Трчањето во базен не само што помага за превенција на физички повреди, туку е и квалитетна фитнес вежба
Трчањето во базен многумина не го сметаат за физичка вежба којашто би ја практикувале често, туку како вежба што вообичаено медицинските лица ја вклучуваат во рехабилитациона терапија во случај на повреда на некој дел од телото.
Напротив, трчањето во базен е спортски трик за останување во добра физичка состојба и избегнување на честите повреди. Имено, многу спортисти и тренери го практикуваат токму трчањето во базен во подготовката за напорни тренинзи и натпревари. Џогирањето во вода не само што помага за превенција на физички повреди, туку е и квалитетна фитнес вежба.
Аманда Башам, атлетичарка и тренер по атлетика за „Carmichael Training Systems“ во Колорадо Спрингс, вели дека едно неделно џогирање треба да се замени со трчање во базен бидејќи тоа помага за одржување на целокупното здравје и добра форма на телото.
„Вклучувањето на трчањето во базен како физичка вежба во вообичаениот неделен тренинг, е проактивен начин со кој може да се превенира исцрпување на телото и енергијата, како и повреди што често се случуваат заради долги и напорни неделни тренинзи“, потенцира Башам.
Трчањето во базен е одлична замена за секојдневно трчање. Меѓудругото внесува динамичност и забава во секојдневното рутинско вежбање и џогирање што често станува монотоно. Предноста во трчањето во базен е тоа што, исто како и кај обичното трчање, ќе можете да ја одредите вашата спремност и според неа да го одредите и нивото на вежбата. Имено, во зависност од ефектот што сакате да го постигнете може да трчате во плитко или длабоко.
Ултрамаратонката Џина Лукреци започнала со трчање во базен заради повреда, но по закрепнувањето – продолжила. Сега оваа вежба е дел од нејзината секојдневна тренинг програма. Таа вели дека трчањето во базен е интересна физичка вежба што претставува еден начин на борење со водата што бара сила, фокус и рамнотежа. Оттука, оваа вежба е добра за одржување на формата на телото.
Двете важни работи за правилно правење на оваа вежба и одредувањето на длабочината во која ќе ја правите, е да се задржи добар баланс и правилно држење на телото, исто како и кај обичното трчање. Главата, вратот и рамењата да бидат слободни и да не бидат под вода. Сè додека овие три дела од телото се над водната површина, длабочината можете да ја одредите сами во зависност од тоа каков ефект сакате да постигнете.
