Постојат некои видови физички активности кои може да бидат ризични за секоја бремена жена, како и за оние коишто носат близнаци.
Можеби сте слушнале многу збунувачки информации за тоа дали е безбедно да се извршуваат физички активности во текот на бременост со близнаци. Всушност, секоја бременост е различна. Оттука, кај некои жени коишто се бремени со близнаци може да се манифестираат компликации и ризици, додека кај други не. Затоа прашањето колку жените коишто се бремени со близнаци може да вежбаат зависи од нивната специфична бременост.
Доколку сте бремени со близнаци и имате висок ризик за компликации, вашиот лекар може да препорача да ги ставите физичките активности во последен план сè додека не се породите. Исто така, тој може да сугерира да намалите со вежбањето во периодот од 20-та до 24-та недела од бременоста или, пак, да практикувате полесни активности за истегнување на мускулите.
Постојат некои видови физички активности кои може да бидат ризични за секоја бремена жена, како и за оние коишто носат близнаци.
Вежби за намалување на телесната тежина
Во зависност од вашата тежина пред бременоста, може да очекувате да добиете плус килограми во бременоста. Зголемувањето на тежината во бременоста може негативно да влијае на расположението кај секоја жена, но намалувањето на истата треба да биде во вашиот фокус откако ќе се породите. Сè додека јадете здрава храна во границите на нормалното, зголемувањето на телесната тежина за време на бременоста е знак за здрав развој на вашите бебиња.
Спортови што го зголемуваат ризикот од удар во стомак
Доколку професионално или аматерски се занимавате со контактен спорт како кошарка, фудбал, одбојка или ракомет, веројатно вашиот доктор ќе ви препорача да направите пауза од играњето бидејќи овие спортовии го зголемуваат ризикот од удари во стомакот. Избегнувајте ги овие спортови по првото тримесечје кога вашиот стомак ќе почне значително да се зголемува.
Спортски активности што го зголемуваат ризикот од падови
Спортските активности како што се скијањето, бордањето, јавањето коњи, дури и возењето велосипед, може да бидат ризични за бременоста бидејќи може да ви создадат потешкотии во одржувањето на рамнотежата на телото заради тежината на бремениот стомак.
Планинарење
Искачувањето планини носи огромни бенефити за физичкото и менталното здравје на човекот. Сепак, во текот на бременоста тоа може да предизвика симптоми како што се главоболка, гадење, повраќање или замор, оттука се препорачува да не планинарите доколку имате потешкотии во бременоста.
Нуркање
Нуркањето во бременоста може да предизвика проблеми. Имено промената на притисокот може да го зголеми ризикот од појава на декомпресиона болест кај вашите бебиња.
Интензивно вежбање со тежини
Интензивното вежбање со тегови и на справи во теретана може да ги зголеми вашите атлетски перформанси, но истовремено може да го намали протокот на крв во матката.
Вежби со лежење на грб
Дополнителната тежина на бремениот стомак може да ја прекине циркулацијата на нозете, стапалата и матката. Избегнувајте позите и активностите во коишто би требало да лежите на грб повеќе од неколку минути.
Постојат многу активности со помал интензитет коишто може да ги практикувате во бременоста без да го ризикувате вашето здравје и здравјето на вашето бебе. Сепак, бидејќи секоја бременост е специфична, разговарајте со вашиот лекар за тоа кои вежби и спортски активности би можеле да ги практикувате во бременоста.
