Топлинскиот оспи може да ги засегне сите возрасти, бебињата се изложени на поголем ризик да развијат топлински осип
Топлинскиот оспи е честа појава во летниот период и може да ги засегне сите возрасти, но бебињата се изложени на по голем ризик да развијат топлински осип заради тоа што нивните потни жлезди се помалку развиени. Во повеќето случаи оваа појава не бара медицинска грижа и може да се среди со неколку елементарни мерки од страна на родителот.
Зошто настанува топлински осип
Милиарија е називот под кој е познат топлинскиот осип во стручната јавност, и настанува заради затварање, запушување на потните жлезди при прекумерно потење при што потните жлезди се затвараат и не е можно да се извршува дишење на кожата (перспирација), кое резултира со црвени испакнатини или пликови. Оваа појава најчесто се случува во лето, кога времето е топло и влажно. Тесната или премногу топла облека може да го влоши.
Симптоми
Бебешкиот топлотен осип изгледа како мали, влажни црвени испакнатини слични на мозолчиња или пликови. Обично се појавува на лицето и на места каде кожата се превиткува: на вратот, рацете, нозете, горниот дел од градите и пелената. Вообичаени симптоми на милијарија се чешање и болка како боцкање. Иако вашето бебе не може да ви каже каков тип на болка има најверојатно ќе забележите дека тоа се однесува чудно и немирно и дека има проблеми со спиење.
Како да се постапи при топлински осип
- Бебето/детето со милиарија треба да се излади во буквална смисла на зборот;
- Додека го бањате бебето користете благ сапун и млака вода за да помогнете во побрзо смирување на кожата и најбитно од се е кожата да се исуши добро без триење пред да се облече бебето;
- Лосионите, пудрите и млеката за тела треба да се прескокнат во овој период бидејќи ќе предизвикаат дополнително затварање на потните жлезди и порите и сето тоа ќе води кон комплицирање на осипот;
- Доколку времето е екстремно топло оставете го бебето да си игра необлечено во домот.
Кога да побарате стручна помош
Ако осипот на вашето бебе трае три или повеќе дена или се чини дека се влошува, обратете се кај вашиот педијатар. Исто така, следете го изгледот на пустулите (меурчињата) и отокот, доколку го сменат изгледот и станат бели, жолтеникави а не се бистри како на почетокот, тоа може да е компликација со габична или бактериска инфекција за кое исто така треба да се побара помош од лекар.
Многу важна работа која треба да се има во предвид е дека покачена телесна температура може да предизвика ваков осип и тогаш секако треба да се обратите на лекар за да се види што е причината за појава на температура кај детето.
Како да ги заштитиме нашите најмили од топлински осип
- Најефективен начин да се избегне оваа појава е да се задржи кожата сува и ладна;
- Избегнувајте тешка облека и носење во кенгур или друг тип на носач, каде што комбинацијата од топлината на вашето тело и слабата вентилација може да ја предизвикаат оваа состојба;
- Избегнувајте да поминувате долго време на отворено во топло време;
- Одлучете се за лабава и лесна облека;
- Никогаш не го оставајте бебето во автомобил само (особено не заради последици кои се многу посериозни од осипување од топлина!), користете го умерено клима уредот кога возите во топли денови;
- Секогаш погрижете се да ја одржите циркулацијата на воздух кога сте во затворена просторија;
- Погрижете се просторијата во која спие бебето да не е премногу загреана и добро проветрена.
