Tecla Shield е најновиот уред кој лицата со инвалидитет ги поврзува со светот [ВИДЕО]

Лицата со инвалидитет или душевни болести се значаен дел од општеството кој ги нема истите можности како останатите во однос на вклученоста во информатичкото општество. Оттука, неопходно е да се развиваат лесно пристапни компјутерски системи за нивна инклузија во новите технологии

Досега се имаат појавено технолошки уреди кои им помагаат на луѓето со инвалидитет да комуницираат со другите, како што е asI.am.here, кој ги преведува мозочните бранови на парализираните лица во разбирливи емоции, но канадската компанија Komodo има развиено уред кој им помага на таквите луѓе да ракуваат со паметни уреди.

Komodo OpenLab е сертифицирана Б корпорација, што значи дека ја користат моќта на бизнисот за да ги решаваат социјалните проблеми. Сертифицираните Б корпорации исполнуваат многу високи стандарди во поглед на општествени и еколошки перформанси, транспарентност и одговорност. Б корпорациите се битен дел од бизнисот затоа што ги инспирираат другите бизниси не само да бидат најдобри во светот, туку да бидат најдобри за светот.

Соосновачите на Komodo OpenLab, Маурисио Меза и Хорхе Силва заедно имаат повеќе од 22 години искуство на полето на асистивната технологија. Нивната филозофија е да се обезбеди пристап за сите. Тоа значи дека се залагаат секоја индивидуа да биде вклучена во општеството, да биде независна и самостојна. „Инвалидитетот не е болест, туку производ на лош дизајн и дискриминација“, вели Силва.

Нивниот производ е Tecla Shield, помагало кој им овозможува на лицата со ограничено движење на горниот дел од телото да имаат целосен пристап до паметните уреди и технологии по значително пониска цена во споредба со традиционалните асистивни уреди. Tecla може да го користат луѓето кои имаат повреда на рбетниот столб, мултиплекс склероза, амиотрофична латерална склероза, мускулна дистрофија, церебрална парализа, повреди на мозокот или мозочен удар.

Tecla е преносен уред кој преку прекинувач се поврзува со паметен телефон или таблет. Кога некој има инвалидитет на горните екстремитети се користат асистивни прекинувачи од типот на софтвер за препознавање на трепкање со очите или џојстик прикачен на инвалидската количка за комуникација, во зависност од способностите. Но, тие помагала не се конектираат директно со хардверот на паметните уреди.

Tecla функционира со сите асистивни прекинувачи на пазарот, вклучувајќи копчиња, контролори кои реагираат на вдишување или издишување преку цевче, уреди слични на потпирач со слушалки кои се носат на глава, џојстик и контроли за возење на инвалидската количка, така што корисниците ќе можат да телефонираат, да читаат мејлови, е-книги, да управуваат со апликациите со кои се контролираат уредите во домот и многу повеќе од тоа.

Тоа значи дека со помош на Tecla може да се работи на паметен уред буквално секаде. Може да се користи лежејќи во кревет или од инвалидска количка. За разлика од другите асистивни уреди, Tecla се прилагодува на вашите потреби.

Со Tecla луѓето со инвалидитет може да се поврзат со уреди и компјутери што работат на iOS и Android, односно со iPhone, iPad, iPod Touch и Android паметни телефони и таблет-компјутери. Поврзувањето е многу едоставно со уредите кои работат на iOS – само треба да се спарат Tecla и паметниот уред, додека со Android треба да се симне бесплатната апликација Tecla Access app од Google Play Store.

Батеријата на Tecla трае една недела. Уредот може да се набави по цена од околу 240 евра.

Превземено од: Иновативност.мк