Во многу ранливи заедници каде што знаењето како да се третираат повреди или да се одржи некој во живот би имала вистинско влијание, недостига свеста за прва помош.
Светскиот ден на прва помош се одржува ширум светот секоја година во втората сабота во месец септември. Овој ден е воведен од страна на Меѓународната федерација на друштвата на Црвен крст и Црвена полумесечина во 2000 година и оттогаш се прославува секоја година.
На овој ден секоја година повеќе од 100 друштва на Црвен крст и Црвена полумесечина низ целиот свет организираат настани и активности со цел подигнување на јавната свест за тоа како првата помош може да спаси животи во секојдневните и кризните ситуации, како и промовирање на достапноста на првата помош. Меѓународната федерација на друштвата на Црвен крст и Црвена полумесечина смета дека првата помош треба да биде достапна за сите, вклучувајќи ги и најранливите, и, исто така, дека треба да биде составен дел од еден поширок развоен пристап.
Терминот „прва помош“ се однесува на помошта дадена на секој што страда од ненадејна повреда или болест. Главните цели на првата помош се да се зачува животот и да се спречи влошувањето на состојбата. Првата помош не секогаш е извршена од медицински лица бидејќи во секојдневни вонредни ситуации обичните луѓе често мора да извршат прва помош за да спасат нечиј живот.
Првата помош понекогаш може да вклучи импровизација, меѓутоа доколку лицето што врши прва помош не знае што прави може да му наштети, наместо да му помогне на засегнатото лице. Оттука, Меѓународната федерација на друштвата на Црвен крст и Црвена полумесечина ги охрабрува луѓето да се стекнат со основна обука за прва помош или барем да се едуцираат за користење на сите достапни материјали и алатки.
Имено, настаните и активностите што се одржуваат овој ден се фокусираат на обуката за прва помош. Секоја година се избира нова глобална тема за овој ден, а учесниците се охрабруваат да планираат и организираат настани според истата.
Пред 150 години, битката во северна Италија предизвика идеја што оттогаш го промени светот. На 24 јуни 1859 година, Хенри Динан, млад женевски бизнисмен, бил сведок на страшно страдање и агонија по битката кај Солферино. Потребата за хуманитарна акција денес сè уште е од витално значење како што беше во 1859 година.
Меѓународната федерација на друштвата на Црвен крст и Црвена полумесечина е еден од водечките светски даватели на прва помош. Првата помош е хуманитарен чин кој треба да биде достапен за сите, бидејќи со вештини за прва помош доброволците и заедниците се овластени да спасуваат животи без дискриминација.
Секоја година на милиони луѓе им е нанесена повреда или им е одземен животот поради несоодветен одговор или недостаток на навремена прва помош. Преземањето итни мерки и примената на соодветни техники, додека се чека за стручна помош, може значително да ги намалат смртните случаи и повредите, како и влијанието на катастрофите и секојдневните итни случаи. Првата помош не е замена за итни услуги. Таа е витален почетен чекор за обезбедување на ефикасна и брза акција која помага да се намалат сериозните повреди и да се подобрат шансите за преживување.
На луѓето коишто живеат во области погодени од војни или катастрофи, честопати не им се дава можноста да бидат обучени за основна прва помош. Во многу ранливи заедници каде што знаењето како да се третираат повреди или да се одржи некој во живот би имала вистинско влијание, недостига свеста за прва помош.
Затоа Меѓународната федерација на друштвата на Црвен крст и Црвена полумесечина верува дека првата помош ги намалува слабостите и помага да се изградат посилни заедници и овој ден го посветува токму на покревањето на свеста за истата ширум свет.
