Лицата со Даунов синдром ги имаат истите потреби како и сите други
Денес низ целиот свет се одбележува Денот на лицата со Даунов синдром (WDSD), светски ден за покренување на свеста за овој синдром, официјално одбележан од ОН во 2012 година, додека за прв пат бил одбележан во 2006 година.
Овогодинешниот Светски ден на Даунов синдром е со фокус на целосна инклузија и учество на лицата со Даунов синдром во социјалните и политичките заедници во коишто живеат.
Оваа година е создадена и интернационална кампања, насловена како „Не посебни потреби, туку човечки потреби“, во форма на видео порака. Терминот „посебни потреби“ („special needs“) се употребува за лицата со попреченост. Лицата со Даунов синдром ги имаат истите потреби како и сите други: да учат, да работат, да можат да го изразат своето мислење и став, да бидат чуени, да бидат рамноправни учесници во заедницата. На овие лица можеби им треба дополнителна помош и прилагодувања за извршување на одредени задачи, но нивните потреби не се „посебни“ или „специјални“
21-ви Март е симболично одбран датум поради трите копии на 21-от хромозом (трисомија) што се присутни во клетките на лицата со овој синдром.
Трисомија 21, медицинскиот назив за овој синдром, претставува облик на хромозомопатија, односно грешка во комбинацијата на хромозомите во 21 пар на хромозоми, која настанува при клеточната делба на новиот плод. Во плодот наместо два хромозома, се појавуваат три. Застапеноста на Дауновиот синдром е 1 на 800 или 1000 раѓања и тој може да се открие за време на бременоста преку амниоцентеза.
Во Македонија, викендов (18 март) во Скопје се одржа хуманитарна трка на лицата со Даунов синдром „И ние го можеме истото како и вие“ со цел да се продлабочи комуникацијата и да се докаже дека овие лица го можат истото што и сите други. Воедно, тука се и заложбите и активност на здружението „Трисомија 21“ за лицата со Даунов синдром, коишто постојано работат на покренување на свеста и подобрување на условите на лицата со овој синдром.
Денес, во Јавна соба во Скопје, од 18 од 20 часот, ќе се одржи настан по повод 21-ви март – Светскиот ден на Дауновиот синдром, а со вистинска причина – „ заедно го правиме светот подобро и поубаво место за живеење…не само на 21ви март, туку секој ден!“, во организација на Инклузивни решенија – Скопје.
