Овогодишната кампања се фокусира на тоа дека на сите луѓе со Даунов синдром треба да им биде дадена можноста да придонесат кон заедницата од којашто се дел.
Светскиот ден на Даунов синдром, којшто секоја година се одбележува на 21 март, е глобален ден за подигнување на свеста за тоа што значи да се има Даунов синдром и како луѓето со Даунов синдром играат важна улога во нашите животи и заедници. Датумот 21 март е избран симболично да ја нагласи уникатноста на трипликацијата (трисомија) на 21. хромозом кој предизвикува Даунов синдром.
Овогодишната кампања на Светскиот ден на Дауновиот синдром го носи името „What I Bring To My Community“. Со оваа кампања фокусот се става на тоа дека на сите луѓе со Даунов синдром треба да им биде дадена можноста да придонесат кон заедницата од којашто се дел и да живеат ценет живот.
„Кога ќе им се даде можност, лицата со Даунов синдром можат да придонесат многу за заедницата, каде и да живеат низ светот. Но многумина се спречени да прават значајни придонеси. Оттука, на Светскиот ден на Даунов синдром, среда, 21 март 2018 година, ние го повикуваме секој човек со Даунов синдром да му каже на светот што придонесува за својата заедница“, се истакнува на официјалната страна на „World Down Syndrome Day“.
Дополнително во склоп на овогодишната кампања и оваа година се продолжува традицијата со носење на многу различни чорапи и боење на ноктите во различни бои како поддршка за подигнувањето на свеста и на социјалните мрежи преку користење на тагот #LotsOfSocks.
Историја на Светскиот ден на Даунов синдром
Светскиот ден на Даунов синдром за првпат беше одбележан во 2006 година во многу земји ширум светот и Асоцијацијата на Даунов синдром од Сингапур беше домаќин на официјалната страница од 2006-2010 година со цел да ги евидентира глобалните активности по повод овој ден.
На 19 декември 2011 година, Генералното собрание на Обединетите нации го прогласи 21 март како Светски ден на Даунов синдром. Тоа одлучи да го назначи 21 март како Светски ден за Даунов синдром и ги повика сите земји членки, релевантните организации на системот на Обединетите нации и другите меѓународни организации, како и граѓанското општество, невладините организации и приватниот сектор да го одбележуваат денот секоја година на соодветен начин со цел да се подигне јавната свест за Дауновиот синдром.
Цели на кампањата „What I Bring To My Community“ 2018
- Да објасни како луѓето со Даунов синдром можат и прават значајни придонеси во текот на нивниот живот, без разлика дали станува збор за училиштата, работните места, заедницата, јавниот и политичкиот живот, културата, медиумите, рекреацијата и спортот;
- Да објасни како надворешните негативни ставови и недостатокот на знаење за потенцијалот на лицата со Даунов синдром како поединци, всушност, ги спречува да имаат можност да направат придонеси;
- Да ги поттикне луѓето со Даунов синдром, како и оние кои ги поддржуваат да се залагаат за нивните права и можности да дадат значајни придонеси;
- Да допре до клучните засегнати страни, вклучувајќи ги едукаторите, работодавачите, јавните власти, медиумите и пошироката заедница за да се осигури дека ги гледаат придобивките од овозможување на луѓето со Даунов синдром да направат значајни придонеси и да ги поттикнат овие засегнати страни да донесат промени и да ја шират оваа порака.
Одбележување на Светскиот ден на Даунов синдром во Македонија
Во Скопје, по повод Светскиот ден на Даунов синдром, на 25 март ќе се одржи третата по ред хуманитарна трка на 1км. Трката која ќе го носи името „И ние го можеме истото како и сите!“ е во организација на Мечувалечки клуб Ескрим и ќе започне во Градскиот парк во Скопје. „Трката е отворена за сите наши хумани граѓани, но ќе учествуваат и децата со Даунов синдром и нивните семејства. Со овој настан сакаме да ја подигнеме свеста за овие прекрасни личности, да ги поттикнеме и останатите спортски клубови да ги отворат вратите за децата со Даунов синдром, да ги вклучиме во спортот и да им обезбедиме еднаков пристап до него како и за редовните деца“, се вели во описот за хуманитарниот настан.
Спортувањето за децата со Даунов синдром е од голема важност за развој на нивната моторика и координација и за одржување на балансот. Меѓудругото, децата преку спортувањето ја добиваат можноста да го развијат својот социјален живот и да стекнат нови пријателства.
Средствата од трката којашто ќе се одржи оваа година ќе се искористат за набавување на аудио опрема за Дневниот центар за лица со Даунов Синдром.
