Дали знаете кои се последиците од слабиот баланс помеѓу работата и личниот живот?
Доживувате стрес на работното место? Не можете да ги одделите работата и личниот живот? Секому се случува. Работата може секому да влијае на личниот живот, а одржувањето на рамнотежата помеѓу неа и животот не е лесно и едноставно.
Балансот помеѓу работата и личниот живот може да биде тежок за одржување без разлика дали сте млади родители со деца, млади коишто живеат сами или со родителите или пак постари родители на тинејџери или студенти. Особено доколку станува збор за губење на работното место поради незадоволство, отказ или други причини што може да предизвикаат стрес, работата може сериозно да влијае на личниот живот.
Сепак, иако не е едноставно, одржувањето на баланс не е и невозможно. За тоа вообичаено се потребни конкретни стратегии што би ви помогнале да постигнете поздрава рамнотежа. Во продолжение ќе споменеме кои се последиците од слабиот баланс помеѓу работата и личниот живот, како и совети што би ви помогнале да постигнете здраво ниво на баланс.
Кои се последиците од слабата рамнотежа помеѓу работата и животот?
Замор
При поголем замор способноста за продуктивно и ефикасно работење може значајно да се намали. Оттука, заморот би можел да ја намали вашата ефективност на работното место или да доведе до сериозни грешки.
Слабо здравје
Стресот е поврзан со негативни ефекти врз имунолошкиот систем и истиот кога се чувствува во голема мера може да го наруши здравјето и при некои посериозни здравствени состојби да ги влоши симптомите и да го отежни лекувањето.
Изгубено време со пријателите и најблиските
Кога работите постојано и одработувате повеќе од предвидените часови во текот на денот често може да се случи да пропуштите важни семејни настани, собиранки и прослави. Ова може да ви создаде чувство на запоставенист и може да им наштети на односите со вашите најблиски.
Како да одржите силна рамнотежа помеѓу работата и животот?
Поставете си граници
Доколку не поставите граници, работните обврски може да ве остават без доволно време за активностите и врските во коишто би уживале и коишто би направиле да се чувствувате исполнето.
Поделете ги работните и личните обврски
Обрнете внимание на вашето секојдневие, вклучувајќи ги и работните обврски и личните активности. Одлучете кои работи во кој момент ви се потребни и размислете на тоа што ви создава задоволство. Важно е подеднакво да се посветите на личните и работните обврски и да не се фокусирате само на работата или само на личниот живот.
Направете си потсетник
Забележете ги семејните настани и креирајте листа на работни и лични задачи на дневно ниво за подобра организација. Креирањето на план и листи со обврски ќе ви помогне да го задржите фокусот на сите обврски без притоа да се насочувате само кон еден тип. Кога немате сопствен план, лесно може да се сконцентрирате на една работа и да заборавите на балансот помеѓу работата и личниот живот.
Хранете се здраво и спијте доволно
Јадете свежо овошје и зеленчук и внесувајте доволно протеини. Спијте квалитетно бидејќи недостатокот на спиење го зголемува стресот.
Создадете време за забава и релаксација
Обидете се секој ден да одвоите време за некоја активност во којашто ќе уживате, без разлика дали тоа ќе биде цртање, читање книга или вежбање.
