Бидете фит и вежбајте дома
Можеби сметате дека скокање со јаже е детска игра, но оваа вежба всушност претставува одлична кардио вежба. Освен физички придобивки има и ред други предности. Не треба да излегувате на ладното време за да одите во сала за вежбање, туку можете со јажето да скокате дома; не претставува финансиски трошок, ниту пак е потребен простор за складирање и лесно може да го носите каде и да одите.
Во повеќето фитнес списанија се пишува дека скокањето со јаже согорува 10 калории во една минута а повеќе од 200 во 20 минутен тренинг. Ова тврдење секако дека звучи примамливо, гарантира примамлив наслов и можеби ќе ве натера да купите јаже, но не постојат точни и конкретни докази за ова. Исто така, колку калории ќе изгубите зависи и од други фактори: од интензитетот на вежбање, физичка подготвеност, начинот на исхрана, начинот на изведување на вежбата, односно скокањето.
Во секој случај, ретко кој ќе започне да брои точно колку калории изгубил или добил. Кај овој вид на кардио вежба, најдобро е чувството што го добивате после вежбањето како и придобивките што ги овозможува.
Придобивки од скокање со јаже
Редовното скокање со јаже ја подобрува координацијата и еластичноста на мускулите, а бидејќи е кардио вежба, го зајакнува и срцето. Постојат истражувања коишто докажале дека оваа вежба ги зајакнува коските и ослободува од стрес. Заради интензивноста, се смета дека побрзо согорува маснотии и поттикнува слабеење.
Со скокањето на јаже го активирате целото тело. Секако, најмногу се активираат листовите на нозете, но и квадрицепсите, тетивите и мускулите на задникот (глутеални мускули). Скокањето со јаже е погодна вежба и за мускулна и за аеробична издржливост. За почеток, особено ако претходно не сте вежбале, не се форсирајте; 10 минути се сосем доволни, времетрање коешто постепено ќе го зголемувате, за да стигнете до половина час (за неколку месеци).
Вежбајте правилно
Како и пред секое друго вежбање, потребно е соодветно да се загреете. Наместо статично истегнување, започнете со одење и лесно трчање во место. Скокањето со јаже брзо може да ви стане еднолично, па затоа најдобро е да го комбинирате со друг вид на аеробични вежби, како на пример серија на вежби за стомачни мускули, па после тоа друга серија за друга група на мускули.
За најголема ефективност, тренерите и кинезиолозите, препорачуваат да се скока со јаже во пократки интервали – од 30 секунди до 1,5 минути.
Исто така, менувајте го стилот на прескокнување. (напред назад, странично, со високо подигнати колена итн.). Најчеста грешка што многумина ја прават при скокање со јаже е преголемото виткање во колената кое само ја отежнува вежбата и само побрзо ќе се изморите. Нозете треба да бидат малку раздвоени и минимално свиткани. Уште еден совет: иако вежбате дома, носете соодветни патики за вежбање, бидејќи ви треба добра поддршка на зглобовите додека скокате со цела тежина на стапалото. Секој тренер ќе ви каже дека најважно е да го слушате своето тело, па така, доколку почувствувате болка, намалете го интензитетот или престанете со скокање.
Скокајте со јаже но не го прескокнувајте вежбањето.
Имајте на ум дека скокањето со јаже ќе ве раздвижи и ќе ви даде енергија доколку сте пасивни во зима, но запомнете дека оваа вежба не е замена за вежбање, односно ако скокате со јаже, не го прескокнувајте сериозното вежбање. Скокањето со јаже всушност треба да биде еден корисен додаток при вежбањето, а не основа.
