Пченичната трева е природен извор на концентрирана количина на витамини и минерали.
Што е пченична трева?
Пченичната трева е тип на млада трева од семејството пченица којашто е богата со хранливи материи. Пченичната трева може да се најде во продавниците за здрава исхрана како додаток во исхраната во форма на таблети, капсули, прав или во течна форма.
Пченичната трева е природен извор на концентрирана количина на витамини и минерали (неколку од нив се антиоксиданти), вклучувајќи:
- Витамини А, Е, Ц, К и Б6;
- Калциум;
- Селен;
- Магнезиум;
- Железо.
Кои се придобивките од пченичната трева?
Многумина коишто го поддржуваат вклучувањето на пченичната трева во исхраната велат дека нејзината богата содржина на хранливи материи го зголемува имунитетот, ги уништува штетните бактерии во дигестивниот систем и му помага на телото да се ослободи од токсините. Сепак, сè уште не се спроведени значајни истражувачки студии коишто би можеле да ги поддржат овие тврдења.
Други, пак, тврдат дека пченичната трева може да помогне во третирањето на несакани ефекти од рак и хемотерапија, анемија, дијабетес, инфекции, улцеративен колитис и болки во зглобовите, меѓу другите здравствени проблеми. Сепак, земајќи предвид дека постојат неколку истражувања за пченичната трева, има многу малку докази дека истата всушност помага за детоксикација на организмот или спречување или лекување на болести. Поголемиот дел од малкуте истражувања, всушност, се фокусираат на ефектите на пченицата на дигестивниот систем на организмот.
Дали пченичната трева е безбедна за консумација?
Генерално, пченичната трева се смета за безбедна за консумација. Може да предизвика гадење, анорексија и запек, меѓутоа, доколку сте алергични на пченица или трева, или имате целијачна болест или нетолеранција на глутен, консултирајте се со вашиот доктор пред да ја вклучите пченичната трева во вашата исхрана.
Пченичната трева вообичаено се одгледува во почва или во вода и се конзумира сурова, што значи дека може да се контаминира со бактерии или мувла. Оттука, пченичната трева не се препорачува да се консумира од страна на бремени жени или мајки-доилки по породувањето.
Пченичната трева не е чудотворен лек и не треба да ја замени редовната медицинска нега или здрава исхрана која треба да вклучува многу свежо овошје и зеленчук. Но доколку се користи разумно и во умерени количини, може да биде интересен додаток во исхраната.
