Очите се огледало на душата, а ноктите и косата се огледало на здравјето. Прва личност која секое утро треба да ја погледнете во очи, да ѝ ја погледнете косата и да ѝ посакате убав ден, е одразот во вашето огледалo
„Косата е одличен маркер на здравјето и многу често ги покажува првите знаци на медицинските нарушувања“ – вели трихологот Сара Г Алисон – Sara G Allison од клиниката „Hair Today, More Tomorrow“ од Harley Street. Секојдневно следете ја состојбата на косата и скалпот и секојпат кога ќе забележите некоја од следниве промени, консултирајте се со вашиот лекар.
Сува кршлива коса
Честата употреба на пеглите за коса, феновите, уредите за виткање коса и други вжештени алатки, несомнено ќе се одрази на квалитетот на косата. Сепак, слабата и оштетена коса што прекумерно се крши, исто така може да биде знак на дехидратација.
„Многумина не пијат доволно вода, затоа пијте најмалку два или три литри течности дневно и избегнувајте алкохол, танини, шеќери и кофеин“ – советува експертката Сара. Во ваков случај се препорачува повеќе витамин Д, минерали, Омега-3 и бакар. Екстремно кршливата коса и опаѓањето на косата, исто така можат да бидат и симптоми на проблеми со тироидната жлезда. Доколку постојано се соочувате со овие проблеми вашиот лекар треба да ве упати на понатамошни тестирања. Сара предупредува дека дури и малите нерегуларности со тироидната жлезда може да доведат до промена на косата. „Слабите дисбаланси може да се вратат во нормала доколку го избегнувате стресот и јадете здраво“ – истакнува таа.
Првут – лушпест скалп
„Првутот или лушпестиот скалп се честа појава и се јавуваат кај околу половина од популацијата“ – вели д-р Адам Фридмен – Adam Friedmann консултант дерматолог од дерматолошката Клиника „Harley Street Dermatology“. „Сепак, зголемениот првут може да биде знак за ослабен имун систем“ – додава тој. Внимавајте доволно да се одморате и избегнувате тензии кога тоа е возможно. Другите состојби на кожата како што се себороичен дерматит, псоријаза и егзема исто така можат да го предизвикаат овој проблем, но во тој случај засегнати ќе бидат и други делови од телото. „Мијте ја косата со медицински шампон против првут што содржи салицилна киселина која ги растопува клетките од кожата, но и катран што содржи природен антифунгален агент или пак, масло од чајно дрво.
Изретчување на косата
„Ова се јавува кај околу 30% од жените што минуваат низ менопауза“ – вели д-р Асим Шејмалек – Asim Shahmalak од клиниката „Crown Clinic“ во Манчестер. „Промените во женските тела доведуваат до хормонален дисбаланс, што резултира со губење коса“, истакнува тој. Добрите вести се дека кај 50% од жените овој проблем може да се реши со земање на хормонална терапија. „За жал, косата изгубена за време на менопаузата не расте повторно кај жените кај кои хормонската терапија не е ефикасна. Единственото трајно решение е трансплантацијата на коса“, истакнува д-р Шејмалек.
