shekjerot-vo-mlechnata-formula-rizik-za-bebinjata-intolerancija-na-fruktoza_image
Споделете со пријателите!

Производителите на млечни формули за бебиња треба да ја отстранат фруктозата или сахарозата или јасно да ги наведат состојките во своите производи.
Педијатрите и генетичарите предупредуваат дека бебињата со наследна интолеранција на фруктоза се соочуваат со зголемен ризик од акутна инсуфициенција на црниот дроб доколку се хранат со млечни формули коишто содржат фруктоза или сахароза.

Производителите на млечни формули за бебиња треба да ја отстранат фруктозата или сахарозата или јасно да ги наведат состојките во своите производи за да им овозможат на родителите да ги избегнат споменатите засладувачи доколку е потребно.

Во научен труд неодамна објавен во „Molecular Genetics and Metabolism“, генетичарите од Универзитетот Емори, д-р Хонг Ли и д-р Мајкл Гамбело, заедно со педијатар-хепатологистот Миријам Вос од Детската болница во Атланта, Џорџија, откриваат четири случаи на новороденчиња со наследна фруктозна интолеранција. Сите четири бебиња коишто биле исхранувани со формула со фруктоза развиле акутна инсуфициенција на црниот дроб која се повлекла откако тие се префрлиле на исхрана со формула без фруктоза.

„Се проценува дека наследната фруктозна интолеранција се јавува кај 1 од 20.000 новородени деца, а може да резултира со оштетување на црниот дроб.“

Се проценува дека наследната фруктозна интолеранција се јавува кај 1 од 20.000 новородени деца. Таа се јавува заради мутации во генот Алдолаза Б, што резултира со неспособност да се метаболизира фруктозата. Раните симптоми на состојбата вклучуваат гадење, повраќање, абдоминална болка и неможност кај новороденчето да се зголеми телесната тежина. Доколку не се препознае, наследната фруктозна интолеранција може да резултира со оштетување на црниот дроб и бубрезите, како и со напади или смрт кај бебето.

Проблемите поврзани со наследната фруктозна интолеранција не се појавуваат доколку новороденчето се дои само со мајчино млеко. Состојбата вообичаено се препознава кога цврстата храна што содржи фруктоза, како што е овошјето, се воведува во исхраната неколку месеци по раѓањето. Сепак, некои бебешки формули, често оние што се засноваат на соја, содржат засладувачи како што се високо-фруктозен сируп или сахароза – шеќер што е направен од фруктоза и гликоза поврзани заедно.

Прочитајте:  Исхрана за бебиња: Протеини од месо или млечни производи?

„Со оглед на тоа што на некои етикети на млечните формули е наведено дека е содржан шеќер, наместо сахароза, за некои од случаите опишани во истражувањето, беше потребно да биде повикан производителот на формулата за да потврди дека сахарозата е токму една од состојките. Заради ова е многу важно производите да се јасно и точно етикетирани“, вели Ли, доцент за генетика и педијатрија на Факултетот за медицина на Универзитетот Емори.

Кај новороденчињата со дигестивни проблеми или алергии, родителите или педијатрите можат да избегнуваат формули што се базираат на кравјо млеко. Меѓутоа, кај алтернативните формули постои поголема шанса производителот да додаде сахароза или фруктоза како засладувач и извор на јаглехидрати.

„Наследната фруктозна интолеранција е, во одредена смисла, многу слична на галактоземијата – наследна интолеранција на лактоза, којашто е попозната состојба за докторите. И симптомите кај црниот дроб предизвикани од наследната интолеранција на фруктоза се слични на оние кај галактоземијата. Оттука, во случај на наследена интолеранција на фруктоза, користењето на формули во коишто не е содржана лактозата, како формули што се базираат на соја и содржат фруктоза или сахароза, може да ја влошат состојбата“, истакнува Ли.

Бидејќи наследната интолеранција на фруктоза е состојба којашто може да се третира, Ли ги поттикнува педијатрите да ја разгледаат како потенцијална дијагноза во случаите кога кај новороденчињата се јавуваат проблеми со хранење, зголемени ензими на трансаминаза или жолтица (знак за оштетување на црниот дроб), а истовремено се хранат со формула којашто содржи фруктоза или сахароза.


Споделете со пријателите!