Со новите протези децата со посебни потреби изгледаат како суперхерои
Благодарејќи на руски старт-ап проект, децата со ампутирани екстремитети можат да станат мали „киборзи“. Ласери, музички плеери, мобилни телефони и останати технолошки алатки, се дел од протезите „КИБИ“ создадени за деца со тешки повреди и ампутирани екстремитети. Името „КИБИ“ доаѓа од деминутив на зборот „киборг“.
Благодарејќи на овие додатоци, децата можат брзо да се социјализираат, а своите протези да ги користат како предност во играњето и комуникацијата со врсниците, смета авторот на проектот „Моторика“ Иља Чех.
Станува збор за добротворен проект на компанијата Can-Touch.ru, специјализирана за индустриско 3D печатење, која заедно со Чех, специјалист за роботика, овозможија производство на 300 протези годишно со намера догодина да произведуваат 1 000 протези на годишно ниво.
Технологијата што се користи при изработка на овие протези, се состои од бел прав од полиамид кој се стврднува со помош на ласер, од каде понатаму се прават различните делови. Цената на протезата „КИБИ“ е од 900 до 1 300 долари, која е значително помала од бионичката протеза која што достигнува цена и до 38 илјади долари.
Денес „Моторика“ произведува шест видови на протези со различни додатоци, а најдобрата вест е дека произведувачите имаат договор со рускиот Фонд за здравствено осигурување, кој целосно ги покрива трошоците при набавка на протезите.
