Превенција на гастритис со здрави животни навики

При првите симптоми, прва помош за ублажување на желудочните тегоби се антацидните таблети за џвакање

Гастритис е воспаление на слузницата на желудникот. Може да се јави одненадеж и да трае кратко време, тогаш е акутен, или може да се развива постепено со тек на време (хроничен гастритис) и да трае подолго. Тој не е специфична болест, туку опфаќа различни воспалителни процеси на слузницата на желудникот. Најчесто е предизвикан од бактеријата Helicobacter pylori, но причина можат да бидат и автоимуни заболувања, долготрајно користење на нестероидни антиинфламаторни лекови, одреден вид на храна, стрес и слично.

Симптомите се чувство на жарење во горниот дел од стомакот, проследено со мачнина, надуеност, повраќање, губење на апетит и намалување на телесната тежина. Во некои случаи, гастритисот води до појава на чир на желудникот и го зголемува ризикот за развој на рак на желудник. Иако кај многу луѓе хроничниот гастритис нема симптоми, тој се развива постепено и се одликува со тапа болка и чувство на ситост по неколку залаци или пак губење на апетит. Сепак, во повеќето случаи, гастритисот успешно се лечи.

При првите симптоми, прва помош за ублажување на желудочните тегоби се антацидните таблети за џвакање, коишто овозможуваат брзо смирување и неутрализација на желудочната киселина, бидејќи дејствуваат локално, формирајќи вода и растворливи минерални соли.

Доколку симптомите траат подолго од една недела, треба да се посети лекар.

Иако третманот за лечење на гастритис е достапен, секогаш треба да се внимава на превенција за појава на гастритис. Превенцијата значи силна здравствена свест кај секој поединец, преку внесување и одржување на здрави животни навики. Правилниот начин на исхрана, заедно со редовна физичка активност и контрола на стресот, се соодветна превенција за појава на гастритис, бидејќи тој се појавува како последица од несоодветна исхрана, брза готова храна, обилни оброци, консумирање многу алкохол и др.

Правилниот начин на исхрана вклучува:

• Јадење помали и почести оброци, 5 до 6 пати дневно. Треба да се внимава храната да биде зготвена или направена на пареа и без многу зачини коишто би можеле да направат иритација на слузницата на желудникот;
• Да не се јаде непосредно пред спиење. Јадете најмалку два часа пред да легнете;
• Да се консумира јогурт, кефир и пробиотици;
• Супи и чорби без масти, кашеста храна и пире од зеленчук;
• Треба да се избегнуваат факторите коишто агресивно делуваат врз желудочната слузокожа, како: кафе, цигари, алкохол, газирани пијалаци;
• Да не се јаде многу жешка или многу ладна храна; таа не треба да биде многу зачинета ниту пак со многу големи парчиња;
• Да се избегнува мрсна и премногу солена храна, производи од бело брашно;
• Сирењето е препорачливо да биде немасно, исто и месото, а рибата да биде приготвена на жар;
• Цитрусните овошја и доматот можат да имаат дополнителен надразнувачки ефект.

Здравите навики треба да се следат и во текот на третман на гастритис.