Дознајте кои се причините и како да ја спречите можната појава на сплескана глава кај вашето бебе
Бебињата се раѓаат со меки глави за да се овозможи правилно формирање и развивање на мозокот во првата година од животот. Оттука, главите на бебињата се многу нежни и кревки. Нормално е главата на новороденчињата да биде издолжена или со неправилна форма бидејќи е обликувана од неколку коски коишто во периодот од неколку дена или недели по раѓањето ќе се спојат.
Ако забележите благо сплеснување на главата на било која страна кај вашето бебе, тоа може да биде знак за можна позициона плагиоцефалија или сплескана глава. Оваа појава кај бебињата може да се манифестира како последица на постојано спиење во истата положба или поради проблеми со нежните мускули на вратот.
Причини за манифестација на сплескана глава кај бебињата
Најчестата причина за појава на позициона плагиоцефалија кај бебето е положбата на спиење. Ова се случува бидејќи бебињата може да спијат на грб со часови, а нивните глави се меки и нежни што може да поттикне благо сплескување на одредено дел. Предвреме родените бебиња се посклони кон оваа појава бидејќи нивните глави се значително помеки од оние на навреме родените бебиња. Исто така, понекогаш се случува да се развие овој синдром и пред раѓање, особено кај близначиња заради притисок помеѓу нивните глави или од карлицата на мајката. Кај бебињата кај коишто е развиено тортиколис или искривување на вратот може да дојде до сплескување на главата.
Знаци за сплескување на главата кај бебињата и лекување
Синдромот позициона плагиоцефалија кај бебињата вообичаено е лесно препознатлив. Често, сплесканоста се појавува на задната страна на главата и на овој дел вообичаено бебето има помалку коса. Доколку забележите дека кај вашето бебе се развива сплесканост на главата, практикувајте ги следниве совети:
- менувајте ја положбата на главата на бебето додека спие на грб на лева и десна страна;
- менувајте ја страната на спиење во креветчето за да охрабрите подеднакво вртење на вратот на двете страни;
- почесто држете го бебето во раце;
- практикувајте повремено лежење на стомак бидејќи помага и во исправувањето на вратот кај бебињата.
Превенција
И покрај можноста за појава на сплесканост кај главата, пожелно е да го заспивате вашето бебе на грб, со тоа што секоја вечер треба да практикувате менување на положбата на неговата глава. Обидувајте се да стимулирате и секојдневни движења на неговата глава и на вратот, како и повремено лежење на стомак за да го намалите ризикот од појава на позициона плагиоцефалија.
Важно е да се напомене дека позиционата плагиоцефалија не влијае негативно на развивањето на мозокот кај бебето и не може да предизвика долготрајни проблеми во изгледот, но едноставни практики, како повремено менување на положбата на спиење, држење во раце или пак лежење на стомак, можат да помогнат да се избегне сплескување на нежното бебешко главче.
