Информирајте се како да си помогнете пред да извршите реконструкција на дојка и кои чекори треба да ги преземете за успешна реконструкција
Реконструкција на дојка претставува хируршки зафат на формирање на дојка, кој благодарение на напредната медицина, носи резултат кој што е многу сличен на природниот изглед на дојката. Донесување на одлука за реконструкција на дојка, како и избирање на метод на реконструкција по извршување на мастектомија е личен избор на жената. Справувањето со карцином и мастектомија е истоштувачко искуство и доколку жената одлучи да прави реконструкција, потребни се дополнителни размислувања основани врз точни информации со цел да ја донесе вистинската одлука.
Процесот на реконструкција некогаш значи повеќе од една операција. Задолжително посоветувајте се до лекарот околу придобивките и можните ризици од ваквата операција. Реконструкцијата се прилагодува според структурата на градниот кош и може да се изврши на повеќе начини и тоа: со користење на сопствено ткиво, со градни импланти или комбинација од двете.
Одлуката за реконструкција на дојка може да зависи од повеќе причини. Од естетски причини, емотивни (зголемување на самодовербата) или практични причини (да се избегне носењето на надворешна градна протеза).
Итна и одложена реконструкција
Реконструкција на дојка може да се направи во исто време со мастектомијата или после интервенцијата или таканаречена одложена реконструкција. Реконструкцијата која што се извршува во исто време со мастектомијата дава подобри козметички резултати. Со оваа постапка се избегнува и психолошката болка заради губењето на дојката. Предностите од итната реконструкција вклучуваат помалку операции, како и помал број на анестезии и лузни. Но некогаш итната реконструкција не е возможна заради повеќе причини. Некои жени не сакаат уште еден хируршки зафат веднаш по мастектомијата или пак сакаат целосно да заздрават, додека други се на хемотерапија и радиотерапија.
Пред реконструкцијата помогнете си самите за да го олесните целиот процес. Постојат неколку навики кои што е добро да ги промените со цел таа да биде поуспешна, а процесот побезболен.
Престанете со пушењето
Доколку сте пушач, веднаш престанете со оваа навика за да немате можни компликации за време на реконструкцијата на дојка. Со пушењето се зголемуваат шансите за инфекција на гради по примањето на анестезијата. Исто така, пушењето го забавува процесот на лечење. Доколку реконструкцијата се изведува со користење на сопствено ткиво, кај пушачот се зголемува ризикот од компликации заради намаленото снабдување со крв. Три месеци пред операција е оптималниот период кога треба да се откажете од пушењето.
Внимавајте на телесната тежина
Доколку имате зголемена телесна тежина, можно е да се појават компликации за време на анестезијата. Побарајте помош од нутриционист кој ќе ви помогне на здрав начин да го изгубите вишокот на килограми пред оперативниот зафат. Диетата треба да се состои од балансирана исхрана богата со сите витамини за одржување на имунитетот на највисоко можно ниво. Здравата диета помага и за намалување на високиот крвен притисок. Намалувањето на тежината со здрава исхрана значи и побрзо опоравување.
Зацврстете се
Физичкото зацврстување е поволно пред секоја операција. Доколку немате воопшто физичка кондиција, посоветувајте се со фитнес тренер и задолжително известете го за вашата медицинска историја.
Внимавајте со лековите
Вашиот лекар ќе ве посоветува пред реконструкцијата да внимавате да не внесувате аспирин, антиинфламаторни лекови и билни суплементи бидејќи сите тие можат да го зголемат крвавењето.
Постојат бројни истражувања кои испитале дека најголем дел од жените кои што имале реконструкција на дојка по мастектомија се задоволни од зафатот. Првенствено се чувстуваат емотивно посилни, со зголемена самодоверба и се чувствуваат подобро и поудобно во свое тело.
