Пародонталната болест е инфекција на потпорните ткива што го прицврстуваат забот во коската, а болеста ја карактеризира појавата на пародонтален џеб. Во потпорниот апарат на забот спаѓаат неколку ткива кои се афектирани од пародонтопатијата: гингивата, перидонталниот лигамент, цементот и коската.
Ова заболување е најчесто предизвикано од лошите навики на четкање и не употребувањето на конец, што овозможуваат наслагите – лепливиот биофилм со бактерии – да се акумулира на забите и да предизвика воспаление на гингивите, кое доколку не се санира напредува во пародонталната болест која може да доведе до болни, отечени гингиви кои крварат, лош здив, оголување и осетливост на забите и нивно расклатување и губиток. Всушност пародонтопатијaта е најчеста причина за губиток на заби кај постарата популација.
Причини
Прв и основен фактор за развојот на пародонталната болест е присуството на наслаги во кои опстојуваат милиони бактерии, доколку наслагите не се отстрануваат редовно и темелно бактериите го уништуваат спојот на забот со коската.
Меѓутоа постојат и голем број на ризик фактори кои придонесуваат кон настанување на пародонтопатијата, меѓу нив пушењето е најзначајниот фактор. Пушењето, исто така, влијае на крајниот резултат на стоматолошкиот третман кој може да биде помалку успешен. Други фактори на ризик се: дијабет, хормонални промени кај девојчињата и жените, особено во бременост, лекови кои го намалуваат лачењето на плунка; одредени имуни болести, како што е СИДА, и генетска предиспозиција.
Симптомите на пародонтопатија:
- Лош здив кој не исчезнува
- Црвени ,отечени гингиви кои се осетливи и крварат при четкање или спонтано
- Метален вкус поради крварењето
- Болки при џвакање
- Клатење на забите
- Чувство на страно тело меѓу забите и иритирачка болка
- Чувствителни заби
- Повлекување на гингивата при што се оголува коренот и забите изгледаат како да се издолжени
Дијагноза
Дијагнозата ја поставува стоматологот по извршениот преглед. Стоматологот првин врши преглед и бара знаци на воспаление, понатаму со користење на посебни инструменти наречени сонди ја мери длабочината на пародонталните џебови и одредува колку е напредната болеста. Во здрава уста длабочината е помеѓу 1-3мм.
Консултирајте се за вашата медицинска анамнеза за да ги идентификувате општите заболувања или факторите на ризик (како што се пушењето или дијабетесот) кои можат да придонесат кон заболување на пародонтот.
Стоматологот исто така може да направи рендген снимки за да процени колкав е губитокот на коскена маса. Расклатувањето на забите е токму показател на губиток на коска. Вашиот матичен стоматолог исто така може да ве упати кај специјалист пародонтолог кој е експерт во дијагноза и третман на заболувањата на пародонтот.
Терапија
Главната цел на терапијата е контрола на инфекција. Видовите на третмани ќе се разликуваат во зависност од степенот на пародонтопатија. Секој тип на третман бара од пациентот да одржува добра орална хигиена и редовно да го посетува матичниот стоматолог. Стоматологот исто така може да предложи промена на одредени навики, како што е откажување од пушење, како начин да ги подобрите резултатите од третманот.
Корисни совети за превенција на пародонтопатија:
Можете да ги одржувате вашите заби и пародонт здрави со:
- Четкање на забите со мека четка два пати на ден и употреба на паста со флуор.
- Секојдневно чистење на просторот меѓу забите, бидејќи тоа е и најчестата локација на пародонталните џебови. Може да употребувате конец, интердентални четки и орален иригатор. За избор на најдобрата опција консултирајте се со вашиот матичен стоматолог.
- Рутинска посета на стоматолог за преглед и професионално чистење.
- Откажување од пушење
