cetka-ili-konec-pravilen-redosled
Споделете со пријателите!

Користење на забен конец, пред четкање на забите можеби е идеалниот редослед за најтемелно отстранување на забните наслаги
Студија објавена од страна на Американската академија за пародонтологија покажала дека користењето на конец пред четкање може да го намали забниот плак и да помогне во максимално искористување на придобивките од флуорот во борба против бактериите. Студијата открива дека користењето забен конец пред четкање може да биде идеалниот редослед за најтемелно отстранување на забниот плак.

Во студијата биле вклучени 25 учесници од кои било побарано прво да ги измијат забите, а потоа да користат забен конец за чистење на интерденталните простори. Во втората фаза, од истата група било побарано да користат конец, а потоа да ги четкаат забите. Студијата покажала дека количината на наслаги помеѓу забите и во устата е значително била намалена кај учесниците кои користеле прво конец, а потоа четка.

Истражувачите објаснуваат дека подобар ефект е забележан поради тоа што конецот ги отстранува наслагите со бактерии и остатоците од храна од интерденталните простори и потоа со четкање и плакнење дополнително се чисти устата од овие наслаги.

Употребата на забен конец може да биде малку непријатна и на почетокот можно е крварење на гингивите. Но, како што здравјето на вашата уста се подобрува со секојдневно користење на конец, крварењето ќе престане (обично во рок од една недела). За лицата со ортодонтски апарати или поголем простор меѓу забите интерденталните четки може да бидат полесни за употреба.

Иако оваа студија потврдува дека користењето забен конец пред четкање може да резултира со намалување на наслагите, важно е да се запомни дека секојдневно мора да се комбинираат двата чекора, четкањето и употребата на конец, за да се задржи оптималното здравје на усната празнина.

Истата студија покажува дека флуорот, минерал кој помага во спречување на кариес, останува во устата во повисоки концентрации кога учесниците користеле забен конец пред четкање. Испитаниците користеле паста за заби со флуор во текот на двете фази од истражувањето.

Прочитајте:  BIOHORIZONS MEM-LOK
Ресорбирачка Колагенска Мембрана
Кои средства за чистење на интерденталните простори се достапни на пазарот?

За правилен избор на средство за чистење на интерденталните површини, секој треба да се консултира со својот матичен стоматолог. Сепак општо важи дека доколку има доволно простор интерденталните четкички се поефикасни во чистењето на овие површини. Поголемата ефикасност на интерденталните четкички се должи на леснотијата во нивното користење, за разлика од забниот конец за кој е потребна посебна вештина за правилно да може да се употребува.

„Никогаш не форсирајте ја интерденталната четка помеѓу забите. Ако не сте сигурни, вашиот стоматолог може да ве посоветува која големина е најсоодветна.“

Орални иригатори се можеби најсупериорни во отстранување на интерденталниот плак и докажано најмногу придонесуваат во намалување на крварењето на гингивите. Кај пациенти со дијабетес поради симбиотската врска со пародонтопатијата испитуван е ефектот од употребата на орален иригатор и  утврдено е дека ги намалува инфламаторните цитокини (IL-1β и PGE2) во гингивална цервикална течност кај пациенти со локализирана блага до умерена пародонтопатија. Исто така забележано е дека оралните иригатори го отстрануваат плакот локализиран под гингивата до 6 мм, а во истовремено не им наштетуваат на околните меки ткива. Употребата на оралниот иригатор не бара посебни вештини како што е случајот со конецот и се препорачува за употреба кај лица со попреченост, постари лица, деца, кај лица кои носат ортодонтски апарати и за одржување на хигиена кај лица со импланти.

Важно е да се напомене дека не постои единствено средство кое најдобро функционира за сите лица. При изборот на соодветно средство за интердентално чистење влијаат многу фактори меѓу кои: леснотијата на користење, големината на интерденталниот простор, умешноста и мотивацијата на поединецот.


Споделете со пријателите!