Иднината која не очекува штотуку стана поинтересна. Огледало кое ќе ви каже што не е во ред со вашето здравје!
Можеби и никогаш не сме си замислувале вакво нешто, а тоа е веќе на прагот на вашиот дом. Сè, само не обично огледало е проект кој можеби наскоро ќе го имате кај вас. Истражувачите кои работат на овој проект велат дека огледалото ќе го прикажува вашиот здравствен статус така што ќе ги анализира карактеристиките на вашето лице. Тие додаваат дека ова паметно огледало ќе биде од огромно значење за превенција на некои хронични заболувања, како на пример срцеви заболувања или мозочен удар.
Што всушност претставува паметното огледало?
Научниците кои работат на овој изум се од повеќе Европски земји. Според нив, ова огледало има задача да ги препознае кардиоваскуларните заболувања, како и мозочниот удар и проблемите со срцето. Примарната цел на овој пронајдок е да ги препознае знаците кои укажуваат на овие заболувања, а со тоа би се намалиле трошоците поврзани со третирање на хроничните болести. За да го направи тоа, огледалото ги собира сите видови на информации поврзани со вас и вашата здравствена состојба за само еден момент.
Истражувачите објаснуваат дека моментално се работи на креирање на прототип. Огледалото би требало со помош на камери да ги документира секојдневните промени на вашето лице со цел да може да препознае некои знаци на стрес, вознемиреност и болест. Огледалото би можело да го процени нивото на хемоглобин во крвта како и пулсот со помош на минутните варијации на бојата на вашата кожа што се резултат на протокот на крв во крвните садови. Благодарение на 3Д скенерот за лице би можеле да дознаете дали сте ослабеле или сте се здебелиле. Додека пак сензорите за гасови би „барале“ некакви хемиски соединенија во вашиот здив за да можат да одредат колку пушите или пиете и дали ви се заканува некаква болест.
Откако ќе ги собере сите овие информации, ова паметно огледало ќе може да ги процесира и да прикаже вкупен резултат за да ви покаже колку сте здрави. Исто така, огледалото ќе може да ви даде и некои совети за подобрување на вашето здравје.
Ова е целосната замисла за тоа како би функционирал овој значаен пронајдок. Огледалото е сè уште во фаза на изработка. Би требало да помине одредено време додека научниците ги средат финесите поврзани со начинот на процесирање на информациите и советите кои огледалото би требало да ги прикаже. Тие се надеваат дека клиничките испитувања за овој изум би започнале веќе од наредната година.
