nizok-krven-pritisok-vo-bremenosta_image
Споделете со пријателите!

Крвниот притисок на жената може да се случи да биде помал во првите 24 недели од бременоста.
Нискиот крвен притисок за време на бременоста е нормална појава. Всушност, едни од факторите што може влијаат на намалувањето на крвниот притисок кај жената, особено во првиот и вториот триместар од бременоста, се флуктуирачкото ниво на хормоните и промените во циркулацијата.

Нискиот крвен притисок за време на бременоста обично не предизвикува значителни здравствени проблеми, а повеќето жени успеваат да го третираат во домашни услови, следејќи ги советите од својот лекар. Сепак, понекогаш многу нискиот крвен притисок може да биде причина за загриженост бидејќи некои жени доживуваат симптоми коишто им создаваат непријатности и можат да влијаат на нивното здравје и здравјето на бебето.

Што може да предизвика низок крвен притисок за време на бременоста?

„Голема е веројатноста крвниот притисок во првите 24 недели од бременоста да биде понизок.“

Земајќи предвид дека бременоста предизвикува многу промени кај жената од огромна важност е да се прават редовни прегледи во текот на сите фази од бременоста. Крвниот притисок може да се менува во зависност од начинот на живот, нивото на енергија, нервоза и стрес кај жената. Крвниот притисок може, исто така, да биде повисок или понизок во зависност од тоа во кој дел од денот се мери.

Крвниот притисок на жената може да се случи да биде помал во првите 24 недели од бременоста. Ова најверојатно се должи на циркулаторниот систем, бидејќи крвните садови се шират за да дозволат проток на крв во матката. Исто така, постојат и други привремени причини за намалување на притисокот, како што се премногу брзо станување или лежење во топла бања подолго време.

Сепак многу други фактори можат да предизвикаат крвниот притисок кај бремените жени да падне на дури пониско ниво од вообичаеното. Овие фактори може да вклучат:

  • алергиски реакции;
  • инфекции;
  • пролонгиран одмор во кревет;
  • дехидратација;
  • лоша исхрана;
  • внатрешно крварење;
  • анемија;
  • срцеви заболувања;
  • пореметувања на ендокрините жлезди.

Премногу нискиот крвен притисок, исто така, може да биде знак на компликација во раната бременост, како што е ектопичната (вонматерична) бременост. Освен овие причини, исто така, често се случува одредени лекови да влијаат на крвниот притисок, па затоа е од витално значење бремените жени да им дадат до знаење на докторите кои лекови ги земаат.

Нормално ниво на крвен притисок во бременоста

За време на бременоста, крвниот притисок е еден од знаците за здравјето на мајката и на бебето. Според „American Heart Association“, нормалниот систолен притисок (за време на контракција на срцето) е 90-120 mmHg и нормалниот дијастолен притисок (кога срцето се одмора помеѓу биења) 60–80 mmHg. Сè што е пониско од ова се смета за низок крвен притисок, но, сепак, во многу случаи и тој може да биде нормален за многу луѓе.

Прочитајте:  Царски рез – ризик за мајката и бебето

Во првите 12 недели од бременоста, вообичаено е жената да забележи пад на нејзиниот крвен притисок. Овој низок крвен притисок често ќе остане на ниско ниво во текот на првиот и вториот триместар и повторно ќе се зголеми во текот на третиот триместар. Во овие случаи, докторите редовно го следат крвниот притисок на жената сè до деновите што го следат раѓањето за да внимаваат на појавата на некоја посериозна компликација.

Симптоми за низок крвен притисок во бременоста

Додека нискиот крвен притисок вообичаено не е загрижувачки, одредени симптоми коишто може да се појават може да бидат вознемирувачки или да го намалат квалитетот на животот кај некои жени, особено доколку првпат се соочуваат со нив. Симптомите за низок крвен притисок вклучуваат:

  • вртоглавица или конфузија;
  • гадење;
  • лесна главоболка која може да резултира со несвестица;
  • чувство на замор кое може да се влоши во текот на денот;
  • чувство на жед, дури и по пиење течности;
  • студена и бледа кожа;
  • проблеми со видот, како што се заматен или двоен вид;
  • депресија.

Ризици од низок крвен притисок за бебето

Еден од основните ризици за жените кои имаат низок крвен притисок е паѓање предизвикано од несвестица. Некои жени со низок крвен притисок кои стануваат премногу брзо по седење или лежење може да се онесвестат и со тоа да се повредат себеси или своето бебе. Губењето на циркулацијата на крвта, исто така, може да предизвика проблеми кај внатрешните органи, што може да предизвика оштетување на некој орган. Тоа може да ја спречи крвта да стигне до бебето, што претставува ризик за здравјето на бебето.

Според една студија, постои мал број на истражувања што покажуваат дека континуираниот низок крвен притисок за време на бременоста може да има негативен ефект врз бременоста и во посериозни случаи може да резултира со мртвороденче.

Сепак, постојат многу други можни причини за овие негативни влијанија врз здравјето на бебето, а нискиот крвен притисок сам по себе обично нема посериозни компликации.


Споделете со пријателите!