Сексуалното здравје повеќе не е табу тема за која ретко кој се осмелува да зборува, напротив, многумина од младите сè повеќе се информираат и отворено зборуваат за сексуално преносливите инфекции
Денес, постојат многу начини на кои можеме да дознаеме повеќе за овие инфекции. Веќе сме доста запознаени со начинот на кој се пренесуваат овие инфекции. Сексуално преносливите болести се шират преку сексуален однос помеѓу две лица, од еден човек што е инфициран со некаква болест на друг. Доколку мајката е инфицирана, таа може исто така да ја пренесе инфекцијата на новороденчето за време на бременоста или за време на пораѓај. Постои и трет начин на кој се шират инфекциите, а тоа е преку крвта. Со вас споделуваме неколку факти за сексуално преносливите болести. Информирајте се навреме.
Сексуално преносливите инфекции (СПИ) честопати не се придружени од симптоми. Ова најчесто се случува кај жените
Затоа, во случаите кога ќе забележите некакви симптоми кај вас или вашиот партнер/ка кои можеби укажуваат на некаква инфекција побарајте стручна помош за да може што побргу да започнете со соодветен начин на лечење со цел да се избегнат можните компликации.
СПИ многу повеќе ги напаѓаат жените и младите девојки
Возраста на која млада девојка може да добие некаква инфекција преку сексуален однос станува се помала и помала. Затоа, информираноста за СПИ е многу важна. Подигањето на свеста за овие болести и начинот на кој младите луѓе можат да се заштитат е од огромно значење.
СПИ можат да бидат причина за оштетување на јајцеводите. Ова може да предизвика проблеми со плодноста кај жените
Жените кои не биле соодветно третирани од кламидија можат да се соочат со воспаление на карлицата. Оштетувањето на јајцеводите кое може да настане како резултат на инфекцијата е причина за прилично голем процент од случаите на неплодност кај жените.
Несоодветното лечење на сифилис во рана фаза за време на бременоста може да биде фатално
Еден од четири случаи на мртво родено дете и околу 14% од смртните случаи кај новороденчињата се предизвикани од ваква несоодветна терапија. Сифилисот е доста распространет во Африка и доколку би се посветило повеќе внимание на соодветни прегледи на мајките за време на бременоста можеби би се спречил преносот на оваа болест од мајката на детето.
ХПВ – Human Papilloma Virus – HPV е дел од најсмртоносните сексуално преносливи инфекции
Оваа инфекција може да предизвика рак на грлото на матката. Ракот на грлото на матката е втор на листата на најчестите видови на рак со кој жените се соочуваат.
Презервативи за заштита
Доколку се употребуваат правилно, презервативите се еден од најефикасните начини за да се заштитиме од СПИ. Постои и женски презерватив, иако тој не се користи толку често како машкиот.
Општествените и економските услови во кои една личност живее, културата, како и информираноста за сексуално преносливите инфекции може да ја зголеми ранливоста на личноста кон СПИ
Подигањето на свеста за сексуалното здравје, превенцијата на СПИ и контролата на ширењето на СПИ кај тие популации, и воопшто на глобално ниво, е од големо значење.
