Врвниот италијански готвач Масимо Ботура подготвувал 5 000 оброци дневно за да го намали гладот во Рио за време на Олимпијадата
Завршија Олимписките игри и донесоа нови светски рекорди, многу скандали и бројни приказни кои што засекогаш ќе се паметат и раскажуваат како: насмевката на Усеин Болт додека трча кон победа (тој стана првиот атлетичар кој победи три пати по ред на 100 метри), пензионирањето на Мајкл Фелпс по освојувањето на својот 28 олимписки медал, младата пливачка – херојка од Сирија, Јусра Мардини, која откако спаси 20 животи од давење за време на бегалската криза, го оствари својот сон и на само 18 години учествуваше на Олимпијада, и уште многу други.
Сепак, најголемата победа ја однесе хуманоста на врвниот готвач Масимо Ботура, со неговата иницијатива за намалување на гладот во Рио. Тој, заедно со бразилскиот готвач Давид Херц и група на готвачи, правеа по 5 000 оброци дневно, користејќи го вишокот храна планирана за олимпијците.
Триесет и првите Олимписки игри се соочуваа со голема критика бидејќи се одржуваат во земја која има проблеми со гладот и се бори со голема економска криза. Оваа иницијатива се обиде да внесе промена и да придонесе кон подобрување на овој горлив проблем. Иницијативата ќе продолжи и за време на Параолимписките игри (7 -18 септември), а по нивното завршување се планира да продолжи да функционира како социјален бизнис. Инаку, италијански ресторан на Масимо Ботура во моментов е на врвот, поточно на прво место на листата на 50-те најдобри ресторани на светот.
