Детските повреди и рани за време на летниот период се чести, затоа прочитајте неколку совети и најчести грешки при третирање на рани
Лето е оној период од годината кога децата поголемиот дел од денот го минуваат надвор. Во двор, на плажа или на базен (што значи постојано скокање во вода), возејќи велосипед низ градските улици, играјќи разни игри со топка, возење ролери. Сите овие детски активности, во одреден момент може да доведат до повреди, бидејќи колку и да внимавате на вашите деца, не може да го предвидите секое нивно движење. Изгребаните колена се дел од детските игри, тие се синоним за едно здраво и активно дете. Најчести детски повреди се гребаници, исеченици и изгореници. За раната соодветно да зарасне со цел да не остане лузна, треба веднаш да се делува и санира. Затоа прочитајте ги следниве совети, како и најчестите заблуди при грижа за детските рани.
Неколку совети при третирање на рана
- Не паничете и дознајте како точно дошло до повредата;
- Утешете го детето додека ја санирате раната;
- Пред да започнете, темелно измијте ги рацете.;
- Не ги потценувајте малите рани бидејќи секое оштетување на кожата има потреба од нега на нежната детска кожа;
- Пред да започнете ја да третирате раната, исчистете ја од песок и нечистотии.
Најчести заблуди при третирање на рана
Доколку детето падне, раната темелно да се исчисти со алкохол.
Оваа заблуда е меѓу најзастапените кај нас. За жал, ова болно искуство не ја подобрува состојбата. Точно е дека алкохолот ги чисти бактериите, но тој директно го оштетува ткивото и не го спречува крварењето, а со тоа го отежнува заздравувањето.
Не треба ништо да се прави, само да се залепи фластер.
Раната, колку и да е мала, мора да се исчисти. Доколку има крварење, тоа мора да се прекине. Потоа, неопходна е соодветна дренажа на раната и употреба на антисептици или антибиотици. Доколку станува збор за мали рани кај кои нема крварење, најдобро е раната да се остави без фластер.
На детето треба да му се даде антибиотик, за секој случај.
Ова е непотребно и опасно. Родителите во никој случај не треба да се одлучат за орален антибиотик без консултација на педијатар. Антибиотиците кои што се внесуваат преку уста, не делуваат на површинските слоеви на кожата. Затоа, треба да се користат антибиотици за дермална, односно, надворешна употреба, со антисептичко дејство.
Постапка
За да не прерасне во нешто посериозно, доколку повредата резултира со рана, на повреденото место треба да се делува постапно, со цел да се спречи ширење на инфекција. Најпрво, доколку има крварење, тоа треба да се прекине со стерилна газа. Потоа, по чистењето и отстранувањето на исцедокот, треба да се употребат антибиотици со локално антисептично дејство. Антибиотиците во вид на маст и прашок за надворешна употреба, формираат заштитен слој кој заштитува од оштетување и го забрзува заздравувањето. Откако ќе се нанесе соодветна маст, може да се употребат стерилни преврски, доколку има потреба од тоа.
НАПОМЕНА: Дадените препораки не се замена за лекарски совет и третман.
