mozna-nova-zdravstvena-pridobivka-od-kokosovoto-maslo
Споделете со пријателите!

Кокосовото масло има различни примени и може да биде доста корисно за нашето здравје
Кокосовото масло може да биде полезно за нас затоа што според научниците, иако содржи прилично многу масти сепак има доста здравствени придобивки. Научниците додаваат дека покрај некои од придобивките од кокосовото масло, постои можност за една нова. Според нив кокосовото масло може да се избори со инфекција во крвотокот која е предизвикана од габата Candida albicans. Сепак, досегашните тестирања се направени само на глувци и истите го испитувале начинот на кој внесувањето на кокосово масло во исхраната влијае врз инфекцијата предизвикана од C. Albicans.

Истражувањата покажале дека исхраната може да биде ефикасен начин да се редуцира количината на Candida кај глувците. Дополнителни истражувања врз луѓе, како продолжение на веќе направените тестови кај глувци, сè  уште не се направени.

Според досегашните сознанија на научниците, Candida-та е една од најчестите причини за појава на инфекции во крвотокот кај пациентите кои лежат на болница.

Здравите луѓе и некои животни може да ја имаат оваа габа во нивниот организам, но кај луѓето кои се болни и ранливи, односно подложни на инфекции, Candida-та може да навлезе во крвотокот и да ги нападне бубрезите, црниот дроб, слезината, белите дробови, мозокот или срцето. Такви луѓе можат да бидат пациентите кои имаат рак, постарите луѓе, пациентите кои треба да подлежат на трансплантација, недоносени бебиња, пациенти на интензивна нега, итн.

„Глувците што конзумирале кокосово масло, имале многу пониско ниво на Candida отколку тие глувци кои се хранеле со вообичаена храна“

Во текот на истражувањето, глувците биле подложени на одреден вид на исхрана. Една група била хранета со храна која содржела високо ниво на масти и вклучувала кокосово масло, масло од соја и лој од говедско месо. Другата група била подложена на вообичаена исхрана. И двете групи се хранеле на овој начин во времетраење од 14 дена пред да им биде инјектирана Candida, а потоа продолжиле со истиот начин на исхрана уште 21 ден. Резултатите покажале дека тие глувци кои биле подложени на храна богата со масти, односно тие кои конзумирале кокосово масло, имале многу пониско ниво на Candida отколку тие глувци кои се хранеле со вообичаена храна.

Прочитајте:  Опстипација и ленено семе

Исто така, како дел од дополнителни тестови, на глувците кои се хранеле нормално во текот на истражувањето им било дадено кокосово масло. После неколку дена, нивото на Candida кај нив станало исто како и нивото кај првата група на глувци кои се хранеле со храна богата со масти за време на истражувањето.

Но сепак, ова исто истражување треба најпрво да биде спроведено врз луѓе за да се провери дали кокосовото масло би го имало истиот ефект кај луѓето.


Споделете со пријателите!