Меѓународен ден на лицата со попреченост

Во Република Македонија се проценува дека 10% или околу 200 000 жители се лица со инвалидитет

Според податоците на Светска здравствена организација (СЗО), повеќе од една милијарда луѓе во светот живеат со некој вид на хендикеп. Ова одговара на околу 15% од светската популација. Стапката на инвалидност постојано се зголемува, поради стареењето на населението и глобалниот пораст на хронични здравствени состојби. Темата на ОН за оваа година е: Постигнување на 17 Цели за Иднината која ја сакаме, која го привлекува вниманието кон 17 Цели на одржлив развој на ОН и како овие цели создаваат поголема инклузивност и еднаков свет за лицата со посебни потреби.

Во Република Македонија се проценува дека 10% или околу 200 000 жители се лица со инвалидитет. Меѓународната Конвенција за правата на лицата со инвалидност, во Македонија е ратификувана уште во декември 2011 година, и правата постојат во законите, но малку се применуваат во пракса.

Конвенцијата објаснува на кој начин треба да се изедначат правата на инвалидизираните лица со другите лица.

Последната мерка на Владата по ова прашање е рефундација од страна на државата, до 3.000 евра за набавка на автомобили за инвалиди. Според оваа Конвенција, земјите учеснички се обврзуваат да донесат непосредни, ефикасни и соодветни мерки за:

1. подигање на свеста преку општеството, вклучено и нивото на семејство во однос на лицата со инвалидност и поттикнување на почитувањето на правата и достоинството на лицата со инвалидност;
2. спречување на стереотипите, предрасудите и штетни пракси во однос на лицата со инвалидност, вклучувајќи и врз основа на пол и возраст, во сите области на живот;
3. промовирање свест за способностите и придонесите на лицата со инвалидност.

Од 2003 година, Македонија е полноправен член како Специјална Олимпијада Македонија. Во клубовите на Специјална Олимпијада Македонија членуваат атлети (возраст 11 – 38 години) со различни пречки во развојот (Даунов синдром, епилепсија, аутизам, интелектуална попреченост итн.). Во оваа организација волонтираат млади луѓе со изградена висока свест, кои секојдневно помагаат да се срушат предрасудите и да се зголемат правата и придобивките на лицата со попреченост.

„Лицата со попреченост многу често се соочуваат со пречки и бариери при пристапот до информации и услуги за сексуално и репродуктивно здравје (WHO/UNFPA, 2009, p. 1). Најчесто непознавањето и негативните ставови на давателите на услуги ги подигнуваат овие бариери иако постоечките сервиси многу лесно може да се адаптираат на лицата со попреченост“, стои во истражувањето кое го спроведе асоцијацијата ХЕРА, која се залага дека лицата со попреченост треба да ги имаат истите потреби во однос на сексуалното и репродуктивното здравје (СРЗ) како и сите останати.