Крекерите се секогаш вкусна закусна, па затоа научете како да направите здрави крекери со голема хранлива вредност
Крекерите со семки и семиња толку брзо и лесно се прават, што можете да ги направите секогаш кога ќе ви се пријадат, а одлични се за грицкање со хумус или гвакамоли. Тие се доволно цврсти да фатат убава количина хумус, а сепак не тврди како шперплоча. Воедно, и најважно, овие крекери се многу вкусни. Може да додадете или промените зачини по желба и вкус.
- ¼ шолја зрна чиа;
- ¼ шолја сончоглед;
- ¼ шолја семки од тиква;
- ¼ шолја овесни снегулки;
- 2 лажици ленено семе;
- ½ лажиче сол;
- зачини (сушен лук, оригано, лут буковец);
- ¼ шолја интегрално ‘ржано брашно (или некое друго);
- 2 лажици ладно цедено сончогледово масло;
- 1 шолја вода.
Измешајте ги сите состојки со лажица и оставете ги да отстојат околу 30 минути. За тоа време, мешавината ќе ја впие водата и ќе се згусне. Потоа исукајте ја мешавината помеѓу две парчиња хартија за печење. Смесата е леплива, а со хартија, лесно оди. Може да го направите врз задната страна на најголемото тавче од рерната. Одлепете ја внимателно горната хартија, со нож за пица или обичен нож, засечете линии по кои крекерите полесно ќе се кршат (ама и не мора ако сакате неправилни форми и големини) и ставете го тавчето во рерна загреана на 150°C. Печете ги крекерите околу 30 минути, ама повремено проверувајте ги. Доколку рерната не пече рамномерно секаде, завртете го тавчето на пола печење. Потоа оставете ги да се оладат, искршете ги и пробајте да не ги изедете одеднаш.
Експериментирајте со разни зрнца, семки и зачини, само внимавајте количините на брашното, водата и чиата според оригиналниот рецепт.
* рецептите со во целост преземени од ситно сецкано
