Кога сте донеле одлука да работите од дома, многу е важно да посветите малку внимание на вашата здравствена состојба
Кога станува збор за работата, има доста луѓе кои се одлучуваат да работат од дома доколку имаат услови за тоа. Работењето од дома ви овозможува брз пристап до вашата домашна канцеларија, нема потреба да се грижите за секојдневното патување до работа, а исто така си имате и сопствена кујна и тоалет. Да не зборуваме за можноста понекогаш да работите облечени во облеката за по дома.
Лесниот пристап до секаков вид на храна може негативно да влијае врз здравјето, додека пак слабата социјализација може да започне да влијае на психичката здравствена состојба. Само неколку промени во секојдневната рутина се с што ви е потребно за да ги споите работењето од дома со добрата здравствена состојба.
Фитнес справа и биро во едно
Наместо да седите на обично биро, доколку може да си дозволите земете си биро и фитнес справа во едно. На горниот дел е бирото, а долу е справата, односно лентата за вежбање, на пример. Според едно истражување, ваквиот вид на биро всушност може да ја зголеми продуктивноста.
Биро за стоење
Кога сме кај бироата, постои и вид на биро пред кое не можете да седите, туку мора да стоите. Иако не изгледа удобно да работите додека стоите, ако работите на овој начин го намалувате ризикот за тип 2 дијабетес, рак и прекумерна телесна тежина.
Правилен избор на храна и доволна количина на вода
Можеби најтешката работа која треба да ја направите кога работите од дома е избегнувањето на нездравата храна (мојот текст за нездрава храна која е здрава), особено кога сте под стрес. Заменете ја нездравата храна со вкусни и здрави оброци и ужини како овошје, зеленчук и храна богата со протеини. Овошјето содржи висок процент на вода што е одлично за вас. Со текот на времето оваа здрава навика ќе стане дел од вашето секојдневие. Пијте доволно вода во текот на денот за хидратација. Водата ќе ве освежи и истовремено ќе ви ја намали желбата за јадење. На овој начин работењето од дома нема да ја загрози вашата здравствена состојба.
Облечете се за на работа
Иако звучи примамливо да си останете во пижамите додека работите, доколку се облечете како да треба да излезете од дома и да отидете во друга канцеларија ќе ви ја подобри продуктивноста и целокупното ментално здравје. Иако работите од канцеларија што се наоѓа во вашиот дом, облекувањето во облека што прилега на работењето надвор од дома ќе ве мотивира да работите уште повеќе. Ова може да ви помогне да останете фокусирани и посветени на работата.
Направете си распоред
Убаво е да си се наспиете и дури после тоа да се грижите за работата што ве чека, но правилното распределување на работното време и работните денови ќе ви помогнат да си ги организирате мислите, да го сработите тоа што е потребно во дадениот временски рок и да не претерате со работа. Здравите работни навики ќе ви ја зголемат ефикасноста затоа што нема да губите драгоцено време како резултат на неконзистентност во работата.
Направете пауза
Но, не било каква пауза. Станете да прошетате повеќе пати додека работите, особено кога мислите ви се блокирани. Ова ќе ви помогне повторно да се фокусирате на работата. Може да се прошетате низ домот или пак во природа. Прошетката во природа си има свои предности. Ја зголемува мозочната активност и креативноста, а пак витаминот Д од сончевата светлина може да го подобри имунитетот и коскеното здравје.
Вежбајте
Вежбањето ќе ви ја подобри здравствената состојба. Работењето од дома го прави вежбањето полесно затоа што може да паузирате од работа кога сакате. Ако не се чувствувате доволно фокусирани, направете пауза за неколку минутни стомачни или јога вежби, и тоа е с што е потребно.
Канцеларија во домот или надвор од него
Многу е важно да имате работен простор кога работите од дома. Посебна соба која ќе ви биде канцеларија или пак некое катче со биро се сосема доволни за да го одделите приватниот живот од работата. На овој начин таа соба или тоа катче ќе ве асоцира само на работа, а остатокот од куќата на одмор и релаксација. Така ќе поставите здрава рамнотежа помеѓу работата и приватниот живот. Но доколку ви е преку глава од работењето од дома, а не можете да си дозволите простор за работа надвор од дома, привремено преместете ја „канцеларијата“ во библиотеката или во некое кафуле каде што има wi-fi и работата е завршена.
