Правилната исхрана е од голема важност за здравјето на човекот. Оттука, неопходно е постојано и внимателно да се следат личните потреби и да се снабдува организмот со потребните витамини и минерали во текот на секоја годишна сезона
Со секоја промена на годишните сезони се менува и начинот на исхрана кај човекот. Топлиот летен период секогаш „наметнува“ консумација на намирници што се богати со хранливи состојки што ќе го подготват телото да ја издржи летната жега и ќе му дадат хидратација на организмот и воедно нема да му предизвикаат потешкотии и мачнини. Месецот август е период од летната сезона кога можеби најсилно се чувствува летната жештина што ги стимулира потребите на организмот за секојдневна консумација на многу течности, како и за внесување на полесно сварлива храна и многу овошје и зеленчук полни со витамини и минерали.
Во продолжение ви претставуваме табела со овошја и зеленчук што треба секојдневно да ги консумирате во месецот август.
Пазарите и маркетите во месецот август нудат огромен избор на здрави и вкусни овошки и зеленчуци што помагаат во хидратацијата на организмот и негово снабдување со многу витамини и минерали.
Неодоливата лубеница е можеби едно од омилените овошја во жешкиот август – сочинета од 90 отсто вода и полна со витамин Ц, ова овошје е одличен избор за летно освежување. Блитвата е зеленчук што е богат со сложени јаглехидрати и оттука претставува добар извор на гликоза, којашто е неопходна за работата на мозокот, а морковот изобилува со витамини и минерали што го прават природен лек кој помага во третирање на многу болести.
Помеѓу летните овошки за консумација во август се и боровинките што изобилуваат со витамин Ц, го подобруваат видот и помагаат во контрола на дијабетесот; малините што се добар извор на витамин Ц, Б1, Б2 и К, како и на калиум, манган, железо и магнезиум и капините кои помагаат во лекување на инфекциите во грлото и во устата. Зелената и црвената зелка се многу силен антиоксидант, бидејќи се полни со хранливи витамини и минерали кои му се потребни на организмот, додека целерот е идеален „летен“ прочистувач на организмот од токсини. Грашокот ја одржува енергијата на клетките на организмот и го штити крвниот систем, а тиквичките бидејќи изобилуваат со минерали помагаат во намалувањето на крвниот притисок.
Смоквата изобилува со магнезиум, калиум, калциум, железо, фосфор, бакар и витамините Б6, Ц и бетакаторен, содржи многу малку масти, а е богата со влакна а дињата e богата со калиум, витамин Ц и витамин А.
Сите овие плодови се лесни за консумација и за освежување на организмот во топлото лето. Овошки и зеленчуци споменати во табелата, изобилуваат со хранливи состојки што влијаат добро на човековото здравје. Секој плод на различен начин придонесува за подобро здравје, помага во лекување на многу болести и го зајакнува имунолошкиот систем. Месецот август е само еден од дванаесетте месеци во годината во која е потребно секојдневна квалитетна исхрана и внесување на потребните витамини и минерали за заштита и одржување на здравјето.
