Школата за трчање на Кокан Ајановски од неодамна нуди бесплатни часови, на кои може секој да се приклучи
Кокан Ајановски, маратонец, државен првак на Македонија во повеќе дисциплини (полумаратон, 10.000 м, 5.000 м., планинско и крос кантри трчање) и репрезентативец на Македонија, е идеалниот човек со кој може да се разговара за трчањето и неговите придобивки. Разговаравме за рекреативното трчање, за неговите лични предизвици и за бесплатната школа за трчање, единствена во Македонија.
„Трчањето е 80 проценти психичка работа“, се зборови на позната амер. маратонка Џоан Беноа Семјуелсон. Колку се согласувате со оваа максима и што преставува за вас трчањето?
Точно е дека сè почнува од психата, односно нашите мисли. Но, успехот во трчањето е како физички, така и психички дел. Залудно е силна психа, ако за тоа нема соодветна физичка подготвеност. Неколку пати ми се има случено мојата глава да кажува дека можам, но моето тело да не е подготвено за физичкиот напор. Трчањето за мене е цела филозофија во која сите предности може да ги ужива една комплетна „wellness“ личност.
Сте тренирале повеќе различни спортови, а се одлучивте за трчање. Кои се предностите на трчањето за разлика од останатите спортови?
Има многу, но ќе издвојам неколку. Трчањето е најекономичен спорт. Индивидуално е, но може да се трча и во група. Можеме да трчаме било каде, независно од условите во кои сме опкружени. Додека трчаме во ист момент ја подобруваме нашата физичка и психичка состојба.
Школата за трчање ја отворивте пред повеќе од 2 години, а од неодамна тренинзите се бесплатни. Колку сте задоволни од одзивот?
NRC – Nike + Run Club е отворен за секој. Може да ни се придружат тотални аматери, но и луѓе кои сакаат професионално да трчаат. Бидејќи одговараме на потребите на секого, интересот е навистина голем. Веќе станавме препознатлив бренд во нашата земја.
Трчањето е тешко и многу луѓе брзо се откажуваат. На кој начин успевате да мотивирате? Воедно, зошто е потребен тренер за трчање?
Потешко е човек да открие вистинска мотивација споредено со самиот чин на трчање. Да поттикнеме некого е нешто најтешко, затоа што не можеме да ги промениме луѓето. Она што можеме да го направиме е да се промениме себеси и преку личен пример да инспирираме и други. Тоа е нешто што веќе со години го правам и се трудам да биде на највисоко ниво. Тренерот е тука за да ги даде правилните насоки во трчањето и како тоа да биде дел од нашиот живот.
Кај кој има поголема заинтересираност, кај помладите или кај повозрасната популација? Кои се подисциплинирани?
Интерес има кај сите. Не постојат млади или стари. Живееме во време кога е веќе докажано дека годините се само изговор за оние кои сакаат да се оправдаат за моменталната ситуација во која се наоѓаат. Дисциплината исто така е индивидуална работа и нема правило кој има поголема, а кој помала дисциплина. Но, едно е сигурно – таа е клуч за успехот.
Имате обичај да кажете дека кејот на Вардар е вашата канцеларија. Што им препорачувате на оние кои што се во стандардни канцеларии, дали трчањето е за секого?
Трчањето е буквално за секого. Има многу деца кои трчаат, но има и луѓе кои се во своите златни години и воодушевуваат со својата физичка активност. Знам многу луѓе кои се успешни во својата професионална дејност (инженери, доктори, адвокати, уметници, професори…), а трчањето им е составен дел од својот живот и не можат да се замислат без да трчаат. Препорачувам секој да проба да трча, затоа што ако навистина сакаме, време има за сè.
Препораки за трчање во летните денови? Дали е подобро да се трча наутро или попладне? Исто така, во која мера треба да се внимава на исхраната?
Во денешно време веќе секој знае дека за успех во било кој спорт, независно дали се занимаваме рекреативно или професионално, неопходно е да се внимава на исхраната. Колку повеќе внимаваме што јадеме, толку поголем ќе биде нашиот напредок. Летото е одлично годишно време да започнеме со трчање. Се разбира дека ќе внимаваме на летните горештини, но затоа може да трчаме или рано наутро или во попладневните, односно вечерните часови. Изборот кога да се трча во денот е индивидуален и зависи од приватните и професионалните обврски, но кога и да одлучите, најважно е да имате континуитет во трчањето и никогаш да не се откажете!
