Оваа година, имаме прилика да разговараме со Марија Амски и Софија Кузмановска од Моментум Инк. – главните „виновници“ за програмата на Health, Fitness & Wellness Expo
Со оглед на фактот дека интересот за последните трендови за здрав животен стил константно се зголемуваат, така и содржината на настанот, но и тимот кој стои зад овој проект расте. Затоа и овој септември, датите 23ти и 24ти се резервирани за третото издание на единствениот кај нас, настан за здрав животен стил – Health, Fitness & Wellness Expo
Третото издание на HFW Expo е најавено на нова локација, Градски парк – терени Работнички. Може да се каже дека ова е заслужено освежување на настанот!
С.К.: Токму така. Еден од новитетите оваа година е самата локација на настанот. Го одбравме Градскиот парк или поконкретно, теренот на Работнички, бидејќи самата тематика и активности многу подобро се вклопуваат во концептот на отворен настан, кој сакаме да го понудиме.
М.А.: Кон Градскиот парк, природно гравитираат луѓето кои уживаат во прошетки и активности на отворено, се интересираат и водат грижа за здравјето, рекреираат или спортуваат, па сакаме да им понудиме поинаков и збогатен викенд во паркот.
Паркот е и место каде сите се чувствуваме пријатно, убаво место за викенд, рекреативна активност, па супер се вклопува и со ваков настан кој е од забавен, едукативен, рекреативен карактер. Се надеваме дека на посетителите ќе им понудиме едно уште поубаво и попријатно искуство!
Mожете ли да споделите на кој начин и според кои критериуми ја креиравте овогодинешната содржина?
С.К.: Истражување, истражување, истражување. Да се креира настан за области и теми како овие, каде секојдневно се појавуваат новитети, подразбира константно следење на се’ она што е тренд и е ново на пазарот и тоа, не само кај нас, туку и ширум светот.
М.А.: Процесот на креирање трае повеќе месеци, а се информираме и инспирираме преку социјалните мрежи, разговори со пријателите и се разбира, успешните светски примери. Секоја година се водиме од желбата да понудиме разновидна програма, со бројни активности, во кои ќе се пронајде буквално секој. Иако Македонија важи за мал пазар, од година во година бројот на домашни компании и организации, кои се дел овие области, расте и сите тие доследно ги следат светските трендови.
С.К.: Би можело да се каже и дека поаѓаме од себе, и она што ние би сакале да видиме на овој настан, односно постојано во процесот на создавање ја имаме на ум публиката и посетителите, и како да им пружиме едно забавно, незаборавно но и корисно доживување.
Од година во година, проектот е се по богат и се по посетен. Убаво е да се забележи дека секоја година посетеноста расте, а очигледно, според објавената програма растат и бројот на активности, демонстрации, презентации. Лани на една, оваа година на четири сцени. Колку и какви се активности ќе можат да видат посетителите кога ќе дојдат на овој настан?
М.А.: Да, четирите сцени се новитет кој има за цел да понуди динамична и богата програма, со преку 70 активности!
Health Center-от е резервиран за кратки едукативни презентации и предавања, кои ќе опфатат широк спектар на теми и проблематики, каде драго ни е да кажеме дека се вклучени голем број на стручни лица од овие области.
Fitness Stage-от е најдинамичната сцена за оваа година. Тука сите посетители ќе можат да се вклучат во тренинзите, кои ќе ги спроведуваат најдобрите спортски центри и клубови во Македонија!
Она што особено ќе ја одбележи оваа сцена е големиот тренинг, во чест на прерано починатата пилатес инструкторка и поранешна балерина – Ирина Митевска. Нејзиното пилатес студио PowerHouse Pilates ја продолжува нејзината мисија во градење на здрави навики и активен живот, па ве покануваме сите – вежбачи, но и инструктори во сабота, на 23ти септември, во 18:15 часот заедно да и оддадеме почит и да извежбаме еден енергичен пилатес час со тимот на PowerHouse Pilates.
Wellness Zone – е катчето каде посетителите ќе можат да се релаксираат, да пробаат разни масажи и третмани и козметика од најдобрите брендови и велнес центри кај нас.
С.К.: Минатат година го воведовме детското катче – Kids Corner, а оваа година активностите за најмалите ќе се одвиваат на многу поголема анимирана површина, каде учество ќе земат голем број на докажани детски едукативни, креативни и спортски центри и организации. Важно е да напоменеме дека ова нема да бидат едноставни активности за да се „занимаваат“ децата додека родителите шетаат, туку издржани, сериозни програми и работилници за унапредување на моторички вештини, креативни работилици и тн, од некои од најдобрите центри, организации и институции кај нас. Ги охрабруваме сите кои имаат дечиња да ни се придружат на настанот заедно, за една прекрасна, корисна и забавна викенд рекреација!
Натпреварите и наградите се неизоставен дел од овој настан, што е ново на тоа поле оваа година?
М.А.: Scavеnger Hunt натпреварот ќе се одивива и оваа година, во текот на двата дена, а годинава го воведуваме и Obstacle Course – натпреварот со препреки, кој ќе бара од учесниците поголема физичка активност, со цел успешно да ги поминат сите „пречки“. Секој посетител на настанот ќе може да се приклучи на овие натпревари, а победниците ќе бидат прогласени во недела, 24ти септември, во 17:30 часот. Најуспешните ќе освојат преку 60 вредни награди, овозможени од овогодинешните учесници.
Покрај овие два натпревари, помали натпревари и награди, ќе обезбедат и п овеќето изложувачи на своите изложбени простори или пак, за време на нивните настапи во програмата.
Секоја година отворањето на настанот е вистинско шоу и атракција, вредно за гледање. Што спремате оваа година?
С.К.: И оваа година спремаме подеднакво атрактивно шоу како и лани! Оваа година во фокус е популарната Spinning® програма, која кај нас ја нуди Sport Inn, кои и оваа година се главен спонзор на настанот. Во сабота, на 23ти септември, во 12 часот, посетителите ќе имаат можност да дознаат колку минути Spinning® се потребни да се добијат 50 мл цеден сок! Енергијата која ќе се создаде вртејќи го точакот ќе ја искористиме да напоиме соковник кој ќе исцеди свеж сок! Вакво нешто кај нас се случува првпат и е навистина впечатливо и шоу кое не смее да се пропушти!
