Експертите препорачуваат тежината на ранецот да не изнесува повеќе од 10 до 15 отсто од вкупната телесна тежина на детето
Децата на училишна возраст често се соочуваат со искривување на ‘рбетот заради неправилно држење и седење, како и заради физичка неактивност. Меѓудругото, уште една причина заради која децата и тинејџерите страдаат од болки во грбот, вратот и рамењата, се тешките ранци коишто секојдневно ги носат во училиште.Ранците се неопходни за децата на училишна возраст и без сомнение практична и здрава алтернатива во споредба со рачните чанти или торбите што се носат на едно рамо, бидејќи со нив тежината се распределува еднакво на грбот, рамењата и останатиот дел од телото. Но иако се попрактични од рачните торби и чанти, доколку не се носат правилно или се претешки и натрупани со непотребни работи, експертите предупредуваат дека и училишните ранци со сигурност може да создадат проблеми, искривувања или болки во ‘рбетот, вратот, рамењата, колковите и колената кај детето.
Научна студија спроведена во 2010 година на Универзитетот во Калифорнија докажа дека голем процент од болките што се појавуваат во ’рбетот и искривувањето на телото на децата на училишна возраст се должат на тешките ранци што секојдневно ги носат. Керен Џејкобс, професорка на Универзитетот во Бостон, САД, исто така, потенцира дека тешките ранци може да предизвикаат главоболки, вртоглавица и проблеми со концентрацијата кај децата на училишна возраст.
Проблеми коишто ги предизвикуваат тешките училишни ранци
1. Врат и горен дел од ‘рбетот
Тешките ранци предизвикуваат наведнување на главата нанапред, како и искривување и истегнување на вратот кои создаваат болка во вратот и рамењата и им отежнуваат на мускулите и лигаментите да го држат телото исправено.
2. Рамења и долен дел од ‘рбетот
Промената од правилно, исправено држење на телото на детето во искривено и наведнато нанапред за да може да ја издржи тежината на ранецот може да резултираат со болки во долниот дел од ‘рбетот и напнатост во рамењата и мускулите.
3. Колкови и колена
Неправилното држење и отежнато движење заради тежината и големината на ранецот создава болки и воспаление на колковите и притисок во колената кај детето.
Совети за избор на училишен ранец
Докторите по ортопедија на Американската академија за ортопедска хирургија препорачуваат дека тежината на ранецот не треба да изнесува повеќе од 10-15% од вкупната телесна тежина на детето, но што помалку е секогаш подобро.
На пример, за дете со вкупна телесна тежина од 36 кг препорачливо е ранецот да тежи од 3,5 до 5,5 кг.
Доколку вашето дете не се жали на тежината на ранецот, а има видливи знаци коишто откриваат дека е претежок за него, меѓу кои најчесто се црвенило и траги од рачките на рамењата, неправилно држење на телото и наведнатост на главата, не се двоумете да реагирате навремено. Набавете училишен ранец што е цврст, но лесен, со анатомски рачки и заден ден квалитетно изработени од лесен материјал којшто нема дополнително да им тежи на рамењата и грбот на детето. Потоа, ранецот треба да биде со соодветни димензии коишто ќе одговараат на телото на детето, односно да не биде поширок и подолг од торзото. Освен две удобни рачки, препорачливо е ранецот да биде со ремен којшто ќе се врзува околу половината за да биде цврсто припиен за телото со минимален простор измеѓу, како и повеќе прегради за книгите и училишниот прибор со што тежината ќе може еднакво да се распредели и нема да создава притисок на одредени делови од телото.
Совети за вашето дете на училиште
1. Редовно да го користи шкафчето или својата работна клупа во училиштето и дел од книгите да ги чува таму во текот на денот и да не го носи постојано ранецот на грб за време на паузите и одморите.
2. Освен книгите и опремата за тековниот ден да не носи во ранецот непотребни книги што тежат дополнително.
3. Во ранецот да ги носи само книгите и училишниот прибор, без личните работи како телефон, игри и сл., коишто додаваат дополнителни килограми на ранецот.
4. Потсетувајте го детето да го носи ранецот на двете рамења и да го врзува ременот околу половината.