Доколку не сте маратонец, скијач или војник на екстремно студени температури, дополнителните дози на витамин Ц веројатно нема да ве заштитат од настинки
Аскорбинската киселина е есенцијална нутритивна состојка којашто му помага на имуниот систем на телото, ја подобрува апсорпцијата на железо, помага во метаболизирањето на протеините и ги регенерира антиоксидансите во телото. Недостигот на овој витамин може да доведе до скорбут, а преголемите дози можат да предизвикаат дијареја, гадење, камчиња во бубрег и вишок апсорпција на железо.
Како повеќето витамини, најдобриот начин на консумирање на витаминот Ц е преку храна: цитрусни плодови, домати, јагоди и спанаќ – се само неколку природни продукти богати со овој витамин. Возрасните мажи треба да земаат најмалку 90 милиграми витамин Ц дневно, додека возрасните жени треба да земаат најмалку 75 милиграми дневно според Американскиот институт по медицина – Institute of Medicine (IOM). Оттаму исто така сугерираат дека лимит на витамин Ц е 2.000 милиграми дневно.
Обидите во кои биле вклучени вкупно 11 илјади испитаници коишто вклучувале маратонски тркачи, скијачи и војници во субарктичките средини, откриле дека овие луѓе биле во состојба да ја намалат појавата на настинки за 50% со земање на 250 милиграми до 1.000 милиграми витамин Ц дневно. За останатите профили на личности резултатите биле поскромни.
Анализата открила дека земањето на витамин Ц превентивно, може да го намали времетраењето на настинката, но не и да ја превенира истата.
Ова е статистички значајно, но веројатно нема големо значење кога лицето е веќе настинато. Доколку испитаниците го земале витаминот Ц откако настинката веќе започнала, оваа состојка немала никаков ефект врз симптомите или времетраењето на болеста, заклучи Американскиот национален институт за здравство – National Institute of Health – NIH.
