Гастритисот се превенира со здравствената свест

Пробиотиците се особено успешни при третман на гастритис предизвикан од Helicobacter pylori

Гастритис претставува воспаление на желудочната слузница. Се смета за мултиетиолошка болест. Како причина за негово појавување може да се сретне Helicobacter pylori, различни автоимуни заболувања, долготрајно користење на НСАИЛ, стрес, консумирање на одреден тип на храна и слично.

Третманот за гастритис е достапен и совршен, но сепак треба да си припомниме на старата добра пого­ворка “подобро е да се спречи, отколку да се леку­ва“. Превенцијата на појава на гастритис е важна точка во здравствената свест кај секој поединец. Во про­должение ќе ги спомнеме најважните аспекти од хи­гие­­но­диететскиот режим за превенција на појава на гастри­тис, кои можат да се аплицираат и во текот на третман на веќе појавен гастритис.

Прво треба да се елиминираат оние супстанции кои со сигурност претставуваат агресивни фактори врз желу­­дочната слузокожа.

Највисоко на оваа листа котираат алкохолот, нико­ти­нот, кафето (вклучувајќи го и она кое е без кофеин), га­зи­раните пијалаци, како и соковите со висока концентра­­ција на лимонска киселина. Користењето на ле­­кови од групата на нестероидни антиинфламаторни леко­ви (НСАИЛ), исто така, треба да се минимализира или комплетно да се замени со оние кои се побезбедни за же­лудникот (ацетаминофен, трамадол).

Во минатото често била препорачувана храна која содржи млеко и многу мали оброци во текот на денот, но денеска истражувачите докажаа дека таква храна не е најдобар избор во случај на гастритис. Во секојдневната исхрана треба, пред сѐ, да се вклучи храна со флавоноиди (јаболка, целер, брусница, кромид, лук), храна богата со антиоксиданти, храна богата со Б витамини и калциум (бадеми, лешници, темен лиснат зеленчук) и протеини кои најмногу потекнуваат од зрнасти плодови, бело месо и риба. Треба да се избегнуваат конзервирана храна и рафинирани продукти (бел леб, шеќер или тестенини).

Од суплементи се препорачува да се земаат анти­оксиданти, омега 3 масни киселини и пробиотици, кои се особено успешни при третман на гастритис предизвикан од Helicobacter pylori.

Во секојдневната исхрана треба да се вметнат и тра­диционални препарати како што се нане, брусница и сладок корен. Правилната исхрана, надополнета со фи­зичка активност и контрола на стресот се соодветна превенција за појава на гастритис.

Д-р Ивона Митрева Банова